Kristinn Freyr Sigurðsson úr Val lék sinn 250. leik í efstu deild hér á landi þegar Valur vann KA, 3:1, á laugardaginn.
Hann er 19. leikmaðurinn í sögu deildarinnar sem nær þessum leikjafjölda. Kristinn hefur þar af leikið 212 leiki fyrir Val í deildinni, 24 fyrir FH og 14 fyrir Fjölni. Deildaleikir hans á ferlinum, heima og erlendis, eru 314 talsins.
Atli Arnarson, miðjumaður HK, lék sinn 250. deildaleik á ferlinum í gær þegar Kópavogsliðið vann KR, 2:1, á Meistaravöllum. Af þessum leikjum er 131 í úrvalsdeild, 78 í 1. deild, 25 í 2. deild og 16 í 3. deild en Atli lék með Tindastóli, Leikni í Reykjavík og ÍBV áður en hann kom til HK í ársbyrjun 2019. Hann er þriðji leikjahæstur í sögu HK í efstu deild með 80 leiki fyrir félagið og sá næstmarkahæsti með 15 mörk.
Ásgeir Sigurgeirsson, fyrirliði KA, lék sinn 200. deildaleik á ferlinum gegn Val. Þar af eru 145 leikir fyrir KA í efstu deild en hann er næstleikjahæstur KA-manna, á eftir Hallgrími Mar Steingrímssyni sem er með 162 leiki. Hallgrímur bætti jafnframt markamet sitt fyrir KA í leiknum en það er nú 54 mörk.
Jón Guðni Fjóluson lék með Víkingi gegn FH í gærkvöld, þegar Víkingar unnu 2:0, og spilaði þar með sinn fyrsta deildaleik á Íslandi í þrettán ár, eða síðan hann fór frá Fram í atvinnumennsku sumarið 2011.
Ellefu leikmenn eru þegar komnir á blað í markaskorun hjá Breiðabliki á tímabilinu, eftir aðeins sex leiki. Danski varnarmaðurinn Daniel Obbekjær bættist í hópinn í Fylkisleiknum en hann skoraði þá sitt fyrsta mark í deildinni, í sínum öðrum leik.
Hallgrímur Mar Steingrímsson bætti markamet sitt fyrir KA í efstu deild gegn Val og skoraði sitt 54. mark fyrir Akureyrarfélagið í deildinni.
Gabríel Snær Gunnarsson og Matthías Daði Gunnarsson komu inn á í sínum fyrsta leik í efstu deild þegar ÍA vann Vestra, 3:0.
Guðfinnur Þór Leósson skoraði sitt fyrsta mark fyrir ÍA í deildinni í þeim leik.
Úrslitin í 6. umferð:
Stjarnan - Fram 1:1
ÍA - Vestri 3:0
Valur - KA 3:1
KR - HK 1:2
Víkingur R. - FH 2:0
Fylkir - Breiðablik 0:3
Markahæstir í deildinni:
6 Viktor Jónsson, ÍA
5 Patrick Pedersen, Val
4 Atli Sigurjónsson, KR
3 Aron Elís Þrándarson, Víkingi R.
3 Atli Þór Jónasson, HK
3 Danijel Dejan Djuric, Víkingi R.
3 Gylfi Þór Sigurðsson, Val
3 Sigurður Bjartur Hallsson, FH
2 Andri Rúnar Bjarnason, Vestra
2 Ari Sigurpálsson, Víkingi R.
2 Arnþór Ari Atlason, HK
2 Aron Bjarnason, Breiðabliki
2 Ásgeir Sigurgeirsson, KA
2 Benjamin Stokke, Breiðabliki
2 Benoný Breki Andrésson, KR
2 Guðmundur Magnússon, Fram
2 Guðmundur Baldvin Nökkvason, Stjörnunni
2 Halldór Jón Sigurður Þórðarson, Fylki
2 Helgi Guðjónsson, Víkingi R.
2 Hinrik Harðarson, ÍA
2 Jason Daði Svanþórsson, Breiðabliki
2 Kjartan Kári Halldórsson, FH
2 Nikolaj Hansen, Víkingi R.
2 Óli Valur Ómarsson, Stjörnunni
Næstu leikir:
20.5. Vestri - Víkingur R.
20.5. KA - Fylkir
20.5. FH - KR
21.5. Breiðablik - Stjarnan
21.5. Fram - ÍA
21.5. HK - Valur