"Stundum raðast hlutirnir upp í lífi manns svo einkennilega vel að það er varla hægt að kalla tilviljanir, skildi þetta allt vera fyrirfram ákveðið?" spyr Kolfinna Baldvinsdóttir á léttu nótunum og segir: "Á föstudagseftirmiðdeginum tökum við upp fyrsta þáttinn af "Mér finnst" sem á eftir að umturna öllu hér á landi, að ég held. Konur að tala hispurslaust um allt á milli himins og jarðar, geturðu ímyndað þér? Allar þessar flottu konur koma í kokteil til okkar klukkan fimm í dag og eftir örlítið hvítvín með þeim vill svo einkennilega til að mér hefur verið boðið í "kvenna" partí um kvöldið og líka laugardagskvöld. Sannkölluð "kvenna" helgi. Ætli afleiðingarnar verði ekki þær að ég fari á fullu að leita mér að "karla" félagsskap, en ég spyr mig þó, hvernig stendur á öllum þessum "kvenna" partíium? Nenna konur ekki að skemmta sér með hinu kyninu? Hélt satt best að segja að það væri mesta fúttið. Verð þó að viðurkenna að konur geta orðið alveg galnar í svona partíum, myndast einhver ótrúleg dynamík sem tryllir mann og annan."

Ertu búinn að finna pör í þáttinn þinn? "Nei en það verður gert um helgina, í síðasta lagi á mánudaginn," svarar Gulli Helga stuðbolti sem stýrir þættinum Hæðin sem sýndur verður á Stöð 2 í mars. Hvernig fara þessi próf fram? "Fólk verður látið hlaupa, kasta bolta í körfu. Nei, nei, það er verið að "casta" í bíómynd, það er ekkert flóknara en það. Saga film er með einhverja formúlu." Þarf parið að þora að koma nakið fram? "Nei það þarf ekki að þora að koma nakið fram því þegar það kemur nakið fram þá veit það ekki af því," svarar Gulli og hlær og bætir við: "Ég er að fíflast í þér. Það eru myndavélar á stöðum sem þau hafa ekki hugmynd um. Nei svona í alvöru þá þarf fólk ekki að koma nakið fram."

"Aðalgaurinn Busy P þeytir skífum á Organ í kvöld ásamt mér og Steed Lord," svarar President Bongo kampakátur í garðskálanum í Skerjafirðinum aðspurður hvað hann ætli að gera um helgina og bætir við að umtalaður plötusnúður, Busy P, sé einna þekktastur fyrir að eiga plötufyrirtækið Ed Banger sem gefur út nýjasta afbrigði af elektró tónlist og umboðsmaður Justice og Daft Punk. Sagt er að Ed Banger kvöldin séu heimsfræg fyrir hressleika og stuð enda ávallt með puttann á púlsi danstónlistarinnar. "Það verður geðveik stemning. Ég lofa því," bætir forsetinn við skælbrosandi.