"Ég er að flytja til landsins, Jack Canfield, einn þekktasta og besta árangursþjálfara heims. Hann verður með námskeiðið "Lögmál sigurgöngunnar" í Háskáolabíói 2. febrúar. Jack er sennilega stærsta nafnið úr kvikmyndinni "Leyndarmálið" sem margir íslendingar hafa séð. Fyrir alla sem vilja bæta árangur og auka lífsfyllingu þá er þetta tækifærið. Þú getur lesið meira um viðburðinn á "newvision.is" segir Kristján Haraldsson eða réttara sagt Viddi í Greifunum. 

"Ég er á haus að vinna fyrir sýninguna mína á Sólon 9. febrúar," svarar Mæja listmálari og segir: "Þar verða stórar akrylmyndir því þetta er nýtt upphaf. Nýtt ár og margt búið að breytast hjá mér." Málar þú ennþá álfa? "Já, ég mála álfa eða meira svona ævintýrapersónur. Það eru brjálaðir litir í gangi og alls konar föt og froskar og hænur og kisur og töfrasprotar. Skemmtileg ævintýri."

Skærir litir lýsa upp skammdegið ekki satt? "Já fallegir litir er nákvæmlega það sem allir þurfa. Miklir litir og grænir hólar á hverju einustu mynd. Engin árstíð. Alltaf heitt og bjart. Ef einhver horfir á mynd eftir mig og brosir þá er ég rosalega ánægð."

"Ég er að undirbúa Hlustendaverðlaun FM 957 sem verða haldin í Háskólabíó 8. mars. Það byrjar allt með rauða dreglinum upp úr hálfníu en þetta verður non stop verðlaunaafhending. Þarna verða fullt af hljómsveitum. Það besta frá íslensku tónlistarmenningunni frá árinu 2007 þar sem við heiðrum meðal annars tónlistarmenn fyrir árið. Þarna veljum við söngkonu ársins, söngvara ársins, hljómsveit ársins, nýliða, plötu og þar fram eftir götunum. Þetta verður alveg ógeðslega flott. Alveg geðveikt. Klárlega flottasta giggið á árinu, megadæmi," segir Brynjar Már tónlistarstjóri FM 957.

 "Ég útskrifaðist úr Menntaskólanum í Hamrahlíð síðasta vor og hef ekki enn ákveðið hvað ég ætla að gera," svarar Anna Katrín Guðbrandsdóttir sem margir muna eftir úr Idol stjörnuleit þegar Kalli Bjarrni sigraði. "Ég er að vinna á leikskólanum Mánabrekku á Seltjarnarnesi sem er frábær vinnustaður. Það gengur rosalega vel. Þetta er skemmtilegasta starf sem ég hef unnið. Ég er að vinna með tveggja og hálfs til þriggja og hálfs árs börnum." Syngur þú fyrir börnin? "Já við gerum mikið af því að syngja saman. Nei, ég syng ekkert úr Idolinu heldur bara þessi gömlu góðu íslensku leikskólalög."

Adolf Ingi er staddur í Þrándheimi með strákunum okkar.

"Það gengur æðislega vel hjá okkur. Maður er ekki búnn að lenda í miklum ævintýrum svo sem. Við vinnum og sofum og erum mjög rólegir. Förum ekkert út á lífið," segir Adolf Ingi Erlingsson íþróttafréttamaður. "Það hefur verið rosalega fín stemning hjá stuðningsmönnunum. Það var svolítið dauf stemning eftir tapið gegn Frökkum en það var létt yfir mönnum á æfingu í dag því Ólafur æfði með þeim og það eru góðar vonir um að hann verði með á morgun gegn heimsmeisturunum. Það náttúrulega léttir lundina hjá strákunum okkar að fá leiðtogann til baka."