"Við byrjuðum síðustu helgi á Broadway með George Michael sýninguna og það er tóm gleði. Framundan eru tíu sýningar,"svarar Friðrik Ómar söngvari. Færðu ekki leið á að syngja alltaf sömu lögin? "Nei maður fær aldrei leið á því að syngja góð lög. Svo er líka svo skemmtilegt fólk sem kemur á sýninguna. Það kemur til að skemmta sér." Einhver vandræði sem þú mátt segja mér frá? "Nei, voðalega lítill vandræðagangur. Þetta hefur gengið snuðrulaust fyrir sig. Við Jógvan bökkum hvorn annan upp ef eitthvað kemur upp á og það er kosturinn við að vera tveir. Þetta er mikil keyrsla. Maður þarf ekki að mæta í ræktina þegar maður er hluti af svona sýningu."