Megum við búast við óvæntum endi á Pressu næsta sunnudagskvöld? "Já ég get lofað því að það er allt að fara í háaloft," svarar Óskar Jónasson kvikmyndagerðarmaður dulur. Verður endirinn blóðugur? "Já fyrir suma," svarar hann enn dularfyllri. Er endirinn rómantískur? "Já fyrir aðra en eins og þú heyrir gef ég ekki meira upp." Fáum við framhaldsseríu? "Það er verið að ræða það. Við erum að kanna viðbrögðin við þessari seríu. Það verður ákveðið með hækkandi sól en það er ekki í mínu valdi að ákveða það."

Allir leikararnir sem ég hef spjallað við segja að þú sért sérstaklega ljúfur leikstjóri? "Ég sé enga ástæðu til annars en ætli ég sé ekki frekar nákvæmur og dáldill vinnupískari en það fylgir því hvernig við gerum þættina. Við gerum þá hagkvæma sem kostar það að leikarar eru æfðir annars staðar en á tökustað."