Bílstjórar sektaðir á sýningu í Laugardalnum

„Það er eðlilegt að það sé farið í eftirlitsferðir inn í Laugardal og víðar þar sem vitað er af fólki,“ segir Kolbrún Jónatansdóttir, framkvæmdastjóri Bílastæðasjóðs.

Nokkur fjöldi þeirra sem lögðu leið sína á sjávarútvegssýninguna í Laugardalshöll í fyrradag varð fyrir því að vera sektaður fyrir stöðubrot.

Dæmi eru um að fólk hafi verið sektað um 10 þúsund krónur á miðvikudag, opnunardegi sýningarinnar, en Kolbrún segist ekki hafa upplýsingar um fjölda eða upphæð sektanna. „Ég get ekki ímyndað mér að það hafi hlaupið á einhverjum hundruðum því þeir voru bara einn eða tveir saman á bíl og það átti ekki að fara í neinar aðgerðir – það á ekki að þurfa á svona viðburðum,“ segir hún, en Bílastæðasjóður hafi ekki sent sérstakan liðsauka umfram venjubundið eftirlit stöðumælavarða á svæðinu.