Markó Partners styður sjávarútvegstengt nám á Íslandi

Markó Partners hefur undirritað samstarfssamning við bæði Háskólann á Akureyri og Fisktækniskóla Íslands um stuðning við sjávarútvegstengt nám við áðurnefnda skóla.

Þetta kemur fram í fréttatilkynningu frá Markó Partners.

Með þessum samstarfssamningi verður nemendum og starfsmönnum skólanna veittur fullur aðgangur að upplýsingaveitunni markofish.com. Að auki munu nemendur og starfsmenn fá aðgang að gögnum í gagnagrunni markofish.com í gegnum Kodiak Excel-viðbót sem þróuð hefur verið af Kóða ehf. sem hefur umsjón með gagnagrunnum markofish.com.

Markofish.com er upplýsingaveita með markaðsupplýsingum fyrir sjávarútveg og er þar m.a. að finna upplýsingar um verðþróun á fiskmörkuðum, veiði- og kvótaupplýsingar, utanríkisviðskipti, ýmiss konar greiningarefni frá helstu greiningaraðilum í sjávarútvegi, auk fyrirsagna frá fréttamiðlum í sjávarútvegi.

Markó Partners mun halda fyrirlestra og vera með sýnikennslu með raundæmum og kynna nemendum og kennurum markofish.com og möguleika á að vinna frekar með gögn í rannsóknum og kennslu.

Allir spenntir og hlakka til samstarfsins

„Við hjá Háskólanum á Akureyri erum mjög spennt fyrir þessu samstarfi,” sagði Ögmundur Knútsson, dósent við viðskipta- og raunvísindasvið Háskólans á Akureyri. „Markofish.com er einstök upplýsingaveita þar sem auðvelt er að fylgjast með þróun á mörkuðum og gefur notendanum möguleika á nánari greiningu eftir eigin þörfum.”

„Við hjá Markó Partners hlökkum mjög til samstarfsins við Háskólann á Akureyri og Fisktækniskóla Íslands. Markmið okkar með markofish.com er að auka gagnsæi og gera notendum mögulegt að rýna betur í markaðsupplýsingar í sjávarútvegi,” sagði dr. Jón Þrándur Stefánsson, yfirmaður greininga hjá Markó Partners.

Markó Partners er ráðgjafarfyrirtæki sem sérhæfir sig í ráðgjöf og greiningum fyrir fyrirtæki í sjávarútvegi á alþjóðavettvangi. Frekari upplýsingar er að finna á https://markofish.com.

• Blogga um frétt