Jöfn og góð kolmunnaveiði í blíðu

Vel hefur fiskast á kolmunnamiðum í færeyskri lögsögu undanfarið. ,,Það er búin að vera mjög góð kolmunnaveiði hér í færeysku lögsögunni. Þetta er okkar önnur veiðiferð á kolmunnamiðin. Við vorum með um 2.600 tonna afla í fyrri túrnum og mér sýnist að þetta verði svipað núna. Þar með er kvóti ársins búinn hjá okkur.“

Þetta er haft eftir Róbert Axelssyni, skipstjóra á Venusi NS, á heimasíðu HB Granda. Rætt var við hann um hádegi en Venus var þá að veiðum norðaustan við Færeyjar.

„Það er búin að vera jöfn og góð veiði frá því áður en við komum á miðin. Við höfum togað frá um fimm tímum og upp í 11 tíma mest og aflinn hefur verið frá 400 tonnum og upp í um 600 tonn í holi,“ segir Róbert en hann segir kolmunnann vera af jafnri stærð og hann sé í góðum holdum.