Hæpið að Sæbjörgin sigli meira

Ólíklegt er að Sæbjörgin, öðru nafni Slysavarnaskóli sjómanna, fari oftar í hringferð um landið. Til að svo gæti orðið þyrfti að fara í kostnaðarsamar viðgerðir á skipinu, sem Hilmar Snorrason skólastjóri segir að ekki liggi fyrir ákvörðum um að ráðist verði í.

Í mörg ár fram til 2008 voru haldin námskeið fyrir sjómenn um borð í Sæbjörg víða á landsbyggðinni yfir sumarmánuðina. Eftir hrun var ekkert siglt fyrr en árið 2014 að farið var í hringferð um landið.

„Síðan höfum við ekkert farið og til að við hreyfum okkur frá Austurbakkanum þarf að fara í stóra viðgerð, sem ég efast um að farið verði í vegna kostnaðar enda er skipið orðið tæplega 43 ára gamalt,“ segir Hilmar í umfjöllun um Sæbjörgina í Morgunblaðinu í dag.