Hagnaðist um tæpa 1,5 milljarða

Framlegð samstæðunnar var 20,4 milljónir evra, nánast hin sama og 2015, að því er fram kemur í tilkynningunni. Þá jókst eigið fé um 9% og eiginfjárhlutfall er sagt vera 38%.

„Fjárfestingar voru miklar á árinu. Nýtt uppsjávarvinnsluhús var tekið í notkun, nýr togari er í smíðum í Kína og skip voru seld og keypt. Framkvæmdakostnaður var 18,4 milljónir evra, að frádregnu söluverði skipa,“ segir enn fremur í tilkynningunni.

Guðmundur Kristjánsson í stjórn

„Leiðarljósið er að láta byggðina í Vestmannaeyjum njóta góðs af arðsömum rekstri og fjárfestingum VSV og styrkja þannig stoðir samfélagsins heima fyrir.

Þrátt fyrir miklar fjárfestingarnar minnkuðu heildarskuldir og skuldbindingar VSV um 3% vegna þess að handbært fé frá fyrri árum var notað til að takast á við nýfjárfestingarnar. Handbært fé dróst að sama skapi saman í reikningum félagsins eða um ríflega 60%.“

Fram kemur að Vinnslustöðin hafi engin langtímalán tekið á árinu, en greitt 12,4 milljónir evra af langtímaskuldum sínum.

Aðalfundurinn samþykkti þá að greiða hluthöfum 8 milljónir evra í arð, sem svarar til 5% af áætluðu markaðsvirði hlutafjár. Þetta er fjórða árið í röð sem hluthafar VSV ákveða að greiða sér arð upp á 8 milljónir evra. 

Fjórir stjórnarmenn af fimm voru endurkjörnir á aðalfundinum: Einar Þór Sverrisson, Guðmundur Örn Gunnarsson, Íris Róbertsdóttir og Rut Haraldsdóttir. Guðmundur Kristjánsson, forstjóri Brims, var þá kjörinn í stjórn í stað Ingvars Eyfjörð, að því er segir í tilkynningunni.

„Í varastjórn voru kjörnir Eyjólfur Guðjónsson og Hjálmar Kristjánsson en þriðji frambjóðandinn til varastjórnar, Guðmunda Bjarnadóttir, fór inn í varastjórn á kynjakvóta og var því endurkjörin líkt og Eyjólfur.“

Vefur Vinnslustöðvarinnar.