Skiptar skoðanir innan flokkanna

Atvinnuveganefnd hefur ekki borist skýrsla starfshóps um stefnumótun í fiskeldi, að sögn Páls Magnússonar, formanns nefndarinnar.

Sem kunnugt er skipaði Þorgerður Katrín Gunnarsdóttir, sjávarútvegs- og landbúnaðarráðherra, starfshópinn. Hann átti að skila skýrslu um miðjan þennan mánuð. Skýrsluna átti að kynna strax í ríkisstjórn og eins í atvinnuveganefnd og umhverfis- og samgöngunefnd.

Frétt af mbl.is

Býst við átökum um fiskeldismál

Páll kvaðst ekki vita hvort starfshópurinn hafi skilað skýrslunni til ráðherra. Atvinnuveganefnd hafi alla vega ekki enn séð skýrsluna. Nefndin hefur ekki fjallað um áhættumat Hafrannsóknastofnunar vegna mögulegrar erfðablöndunar milli eldislaxa og náttúrulegra íslenskra laxastofna.

„Áhættumat Hafrannsóknastofnunar var unnið fyrir starfshópinn og verður hluti af heildarskýrslunni sem skilað verður til ráðherra,“ sagði Páll. Hann sagði að heildarskýrslan yrði rædd í nefndum Alþingis þegar hún lægi fyrir.

„Þetta mál er býsna erfitt. Það eru uppi margs konar sjónarmið innan stjórnmálaflokkanna um málið og það fer ekki endilega eftir flokkslínum. Ég geri ráð fyrir að þetta verði með viðkvæmari og erfiðari málum sem Alþingi fær til úrlausnar á haustþingi, ekki síst í atvinnuveganefnd,“ sagði Páll.

Þorgerður Katrín Gunnarsdóttir landbúnaðarráðherra mun mæta á fund atvinnuveganefndar á mánudaginn kemur til að ræða stöðu sauðfjárbænda. Stefnumótun í fiskeldi er ekki á dagskrá fundarins. Páll kveðst ekki vita hvort ráðherrann muni nota tækifærið til að kynna fiskeldisskýrsluna á fundinum, enda sé ekki ljóst hvort skýrslan verði tilbúin þá.