Byggðastofnun hefði mátt vanda betur til verka

Atvinnu- og menningarráð Vesturbyggðar lýsir ánægju sinni með niðurstöðu starfshóps sjávarútvegs- og landbúnaðarráðherra um stefnumótun í fiskeldi fyrir sunnanverða Vestfirði.

Þetta kemur fram í fundargerð ráðsins sem birt hefur verið á vef Vesturbyggðar, en ráðið kom saman til fundar á mánudag. Segir í bókun ráðsins að það telji þó að eðlilegt hefði verið að þau sveitarfélög, sem hafa beina hagsmuni af uppbyggingu fiskeldis, hefðu átt fulltrúa í starfshópnum til að tryggja sanngjarna og bráðnauðsynlega umfjöllun um byggðamál.

Frétt af mbl.is

Skoðuðu áhættu en ekki ávinning

„Jafnframt fagnar ráðið niðurstöðu hópsins sem leggur til að 85% af auðlindagjaldi sem lagt verður á greinina renni til uppbyggingar innviða á þeim svæðum sem nýtast við uppbyggingu fiskeldis,“ segir í bókuninni.

Betur hefði mátt vanda til verka

„Það er einnig fagnaðarefni að Byggðastofnun hafi farið í það verkefni að vinna skýrslu um byggðaleg áhrif fiskeldis. Við teljum þó að betur hefði mátt vanda til verka og auðvelt hefði verið að koma með betri greiningu á stöðunni. 

Athugasemd er gerð við það að ekki var leitað eftir aðkomu sveitarfélagsins að neinu leyti við gerð skýrslunnar og ekki var óskað eftir því að skýrslan væri lesin yfir þrátt fyrir að ítrekað væri vísað í svör sveitarfélagsins við spurningum starfshóps ráðuneytisins um mótun stefnu í fiskeldi.“

• Blogga um frétt