Íslenskur lax fjarskyldur Evrópulaxi

Í nýrri grein sem birt var í Vísindariti Alþjóðahafrannsóknaráðsins, ICES Journal of Marine Science, er greint frá niðurstöðum viðamikilla rannsókna á erfðafræði Atlantshafslax.

Lax í 13 Evrópulöndum var rannsakaður og notuð 14 erfðamörk. Sýnum (26.822 fiskar) var safnað af 467 stöðum í 282 vatnakerfum.

Gögnin sýna að íslenskur lax er fjarskyldur öðrum evrópskum laxastofnum. Annars staðar í álfunni greinist laxinn í tvo meginhópa; norðurhóp og suðurhóp. Síðan er hægt að greina lax í erfðahópa eftir svæðum. Með þessum gögnum er unnt að rekja lax sem veiðist í sjó til síns heima, annaðhvort eftir landsvæði eða til ákveðinnar áar.

Íslenskur lax skiptist einnig í hópa. Þar eru tveir meginhópar; annar á Norðurlandi, hinn á Vesturlandi, að því er fram kemur í Morgunblaðinu í dag.