Smíða sex frystitogara eftir íslenskri hönnun

Eitt stærsta útgerðarfélag Rússlands, Norebo Group, hefur skrifað undir samning hjá Severnaya-skipasmíðastöðinni í St. Pétursborg um smíði sex frystitogara, en hönnunin er í höndum Nautic og Knarr.

Þetta kemur fram í tilkynningu frá Knarr, en á bak við samsteypuna standa ís­lensku fé­lög­in Skag­inn 3X, Nautic, Kæl­ismiðjan Frost, Brimrún, Skipa­tækni ehf. og Naust Mar­ine.

Frétt af mbl.is

„Óskiljanlegt“ að þetta hafi ekki gerst fyrr

Skipin eru af svokallaðri Enduro Bow-hönnun og verða öll 81 metra löng og 16 metra breið. Smíði skipanna mun að sögn hefjast á næsta ári og eiga þau öll að vera tilbúin 2023.

Haft er eftir Vitaly Orlov, forstjóra LLC Norilab Management Company, sem er eitt þeirra fyrirtækja sem eru innan Norebo Group, að þar hafi menn tekið ákvörðun um að ráðast í smíði samkvæmt nýrri og framsækinni hönnun frá Nautic/Knarr.

Skipunum er ætlað að veiða við erfiðar aðstæður í Norðuríshafi og framleiða hágæða afurðir í meira magni en áður hefur þekkst, með nýjasta tækjabúnaði sem er í boði á markaðnum.

• Blogga um frétt