„Alveg vitlaust veður“

„Við vorum rúmlega sólarhring að sigla á miðin suðaustur af Færeyjum. Við tókum einungis tvö hol en síðan skall á bræla og við liggjum nú í höfn í Kollafirði. Það er í reynd alveg vitlaust veður og kolmunnaskipin hafa öll leitað hafnar eða liggja í vari. Við erum komnir með rúmlega 600 tonn,“ sagði Tómas Kárason, skipstjóri á Beiti NK, sem hélt ásamt Berki NK til kolmunnaveiða í færeysku lögsögunni á sunnudagskvöld, er hann var inntur frétta síðdegis í gær.

Ofsaveður hefur gengið yfir Færeyjar síðustu sólarhringa og hefur tjón orðið víða, eins og sjá má af umfjöllun færeyska Kringvarpsins.

Haldið aftur til veiða á morgun

„Í fyrra holinu lentum við í smá óhappi með trollið og það gaf einungis 65 tonn en í síðara holinu fengum við 550 tonn. Börkur er kominn með svipaðan afla og við en Bjarni Ólafsson kom eiginlega beint í bræluna,“ er haft eftir Tómasi á vef Síldarvinnslunnar.

„Þetta veður á ekki að ganga almennilega niður fyrr en á laugardag og þá verður haldið til veiða á ný.“

Ekki hefur verið mikið af ís­lensk­um skip­um á veiðisvæðinu við Færeyjar. Þar er hins veg­ar tölu­vert um fær­eysk og hol­lensk skip, að sögn Róberts Axelssonar skipstjóra á Venusi NS.

• Blogga um frétt