Náðu ekki samkomulagi um skiptingu

Ekki náðist samkomulag um skiptingu heildarafla norsk-íslenskrar síldar milli strandríkja á fundi þeirra, sem lauk í Kaupmannahöfn í gær. Fulltrúar Íslands vildu að miðað yrði við ráðgjöf ICES, Alþjóðahafrannsóknaráðsins, sem hljóðar upp á 384 þúsund tonn.

Var sú tillaga ekki samþykkt, heldur komu ríkin sér saman um að miða sínar aflaheimildir við 435 þúsund tonna heildaraflamark.

Í tilkynningu frá atvinnuvega- og nýsköpunarráðuneytinu segir að Ísland hafi fallist á þessa niðurstöðu til að samstaða næðist um aflamarkið, og í ljósi þess að aflinn á árinu 2018 verði engu að síður innan þeirra varúðarmarka sem ICES hefur reiknað út.

• Blogga um frétt