Nokkra aukningu er að finna í fjárlagafrumvarpinu á fjármagni til Hafrannsóknastofnunar á næsta ári. Auknu fé verður varið til rannsókna á lífríkinu í hafinu og verður úthaldsdögum rannsóknaskipa fjölgað og tækjabúnaður þeirra bættur. Í frumvarpinu kemur fram að áætlað er að kortleggja um 6% af hafsbotninum í efnahagslögsögu árið 2018.

Gert er ráð fyrir því að fjárheimildir hækki um 165 milljónir króna vegna framlags til aukinna rannsókna Hafrannsóknastofnunar.

„Vegna breyttra hafstrauma og sjávarhita við Ísland hefur útbreiðsla og stofnstærð ýmissa fiskistofna breyst. Sérstaklega eru þessar breytingar hraðar í uppsjávarfiskum. Útbreiðsla loðnu hefur breyst mikið undanfarin ár, mælingar og rannsóknir taka því meiri tíma en áður og kosta meira. Gert er ráð fyrir að auka rannsóknir með auknu úthaldi rannsóknaskipa,“ segir í fjárlagafrumvarpinu.

Loðnuleiðangur í janúar

Þá er gert ráð fyrir að 30 milljónum verði forgangsraðað til Hafrannsóknastofnunar til þess að styrkja loðnurannsóknir með ráðningu sérfræðinga í líkana- og bergmálsmælingum.

Framundan í janúar er árlegur leiðangur til að rannsaka útbreiðslu og ástand loðnustofnsins og taka bæði rannsóknaskipin, Árni Friðriksson og Bjarni Sæmundsson, þátt í verkefninu. Í umfangsmiklum loðnuleiðangri í september og fram í október fannst talsvert af loðnu. Í kjölfarið gaf stofnunin út ráðgjöf um að aflamark á vertíðinni 2017/18 verði 208 þúsund tonn og koma rúmlega 126 þúsund tonn í hlut Íslands.

Fréttin í heild sinni birtist í Morgunblaðinu.

Tengdar fréttir

Fjárlög 2018

Umræðu um fjárlög lauk á miðnætti

• Framlögin aukin um 450 milljónir
• Ríkisstjórnin leiði verðlagshækkanir
• „Gefur lítið tilefni til bjartsýni“
• Fjárlagavinnan gengur vel

» Fleiri tengdar fréttir