Vilja nota lokaðar sjókvíar í Eyjafirði

Skipulagsstofnun er með til skoðunar drög að matsáætlun fyrir allt að 20 þúsund tonna laxeldi í innanverðum Eyjafirði. Að baki áformunum stendur fyrirtæki sem vinnur að þróun lokaðra sjókvía og er byrjað að framleiða í þeim lax í Norður-Noregi.

AkvaFuture ehf., sem er íslenskt dótturfélag AkvaDesign, sækir um leyfið í Eyjafirði.

Poki sjókvíanna sem dótturfélög AkvaDesign nota er úr trefjaplastsdúk í stað opins nets í hefðbundnum sjókvíum. Hægt er að stýra lífríkinu í kvínni, meðal annars með straumum, og nota lúsfrían sjó. Þá er allur fastur úrgangur tekinn úr kvíunum og minni hætta er talin á slysasleppingum, að því er fram kemur í umfjöllun um áform þessi í Morgunblaðinu í dag.