Plast í Norðurhöfum vekur ugg vísindamanna

Norska heimskautsstofnunin birti á mánudag niðurstöður rannsóknar á umfangi plastmengunar í Norðurhöfum. Kemur þar fram að haugar af plasti finnist mjög víða á ströndum Svalbarða, auk þess sem plast hafi fundist í úthafinu milli Grænlands og Svalbarða og sömuleiðis á Barentshafi og botni þess.

Út frá niðurstöðunum er gert ráð fyrir því að á hverjum ferkílómetra þessa svæðis finnist að meðaltali 194 hlutir sem flokkast sem rusl. Ruslið í heild sinni er talið vega 79 þúsund tonn og er að mestu plast.

„Í Norðurhöfunum er nokkur skipaumferð. Þangað flyst einnig rusl og mengun með sjóstraumum úr suðri,“ hefur norska ríkisútvarpið eftir rannsakandanum Ingeborg Hallanger.

Lestu meira

„Hafið á það inni að við tökum slaginn“

Segir í umfjöllun ríkismiðilsins að magnið hafi komið vísindamönnum í opna skjöldu og að þeim standi af því nokkur stuggur.

„Það eru litlu agnirnar, smærri en millimetri, sem valda okkur mestum áhyggjum,“ segir Hallanger. Þessar plastagnir geti haft ófyrirséðar afleiðingar fyrir lífríki hafsvæðisins.