Ný Hafborg reynst vel í alla staði

„Þau voru alveg bunkuð af fiski netin, þegar við drógum upp á laugardag fyrir páska,“ sagði Guðlaugur Óli Þorláksson, útgerðarmaður og skipstjóri á Hafborg EA-152 frá Grímsey, í samtali við fréttaritara Morgunblaðsins á páskadag. „Mest fengust yfir 600 kíló í net en aflinn í heild var um 37 -38 tonn í 60 net.“

Konfekt um borð. Þórir Örn Gunnarsson rekstrarstjóri hafna í Norðurþingi og hans menn fara um borð í Hafborgina á Húsavík. Þeir höfðu meðferðis konfektkassa handa Óla og áhöfninni ásamt hamingjuóskum með nýtt og glæsilegt skip. mbl.is/Hafþór Hreiðarsson

Hafborgin var þá á norðurleið eftir stuttan en snarpan veiðitíma í Breiðafirði, 10 til 11 róðra, en róið var frá Grundarfirði og landað þar. Aflanum var síðan ekið norður til Húsavíkur til vinnslu hjá GPG fiskverkun þar í bæ.

„Verður sjálfdauður úr elli“

Nýtt 48 síðna sjávarútvegsblað fylgdi Morgunblaðinu á föstudag.

„Við byrjuðum veiðar fyrir norðan 5. mars, lögðum netin í Skjálfanda þar sem við fengum um hundrað tonn áður haldið var í Breiðafjörðinn upp úr 20. mars. Þar erum við búnir að fá um 240 tonn til viðbótar. Við vorum nánast einskipa á miðunum og síðustu dagana var alveg mok af stórum og góðum þorski. Fiskur sem ég vil meina að við mættum og ættum að veiða mun meira af en gert er í dag. Annars verður hann bara sjálfdauður úr elli því hann hefur verið verndaður svo mikið og lengi,“ segir Guðlaugur Óli sem jafnan er kallaður Óli.

Þess má geta að í heildina notuðu karlarnir á Hafborginni tæp 70 net til að veiða þessi 340 tonn upp úr sjó. Skiptu sem sagt um innan við tíu net í trossunum á tæpum mánuði.

Greinina má sjá í heild sinni í nýjasta sjávarútvegsblaði 200 mílna, sem fylgdi Morgunblaðinu föstudaginn 6. apríl.

• Blogga um frétt