Það eru engin rök fyrir því að lækka gjöld á sjávarútvegsfyrirtæki um þrjá milljarða þegar fé vantar í önnur verkefni. Þetta sagði Hanna Katrín Friðriksson, þingflokksformaður Viðreisnar, í þættinum Víglínunni á Stöð 2 í hádeginu.

Þau rök séu notuð að lítil sjávarútvegsfyrirtæki úti á landi séu í vanda. „Það er líklega rétt,“ sagði Hanna Katrín. „En það eru mörg lítil fyrirtæki á landsbyggðinni í vanda, ekki bara sjávarútvegsfyrirtækin og ekki eru stjórnvöld að leggja sig fram um að hjálpa þeim.“

Sagði hún ekkert mál að koma með sértækar lausnir fyrir lítil fyrirtæki í vanda á meðan að veiðigjaldslöggjöfin sé endurskoðuð.

Ætlar ekki að afsaka seinagang

Kristján Þór Júlíusson sjávarútvegsráðherra sagði lækkunina nema 1,7 milljörðum nettó, ekki þremur milljörðum og að erfitt væri að koma breytingu á varðandi lög um sjávarútveginn. „Það er sama hvernig stjórnarmynstur er, hver einasta breyting er mjög umdeild,“ sagði hann. „Það er þó ekki til fyrirmyndar að mál komi svo seint inn og ég ætla ekki að reyna að afsaka það.“

Forveri hans í embætti, Þorgerður Katrín Gunnarsdóttir, þingmaður Viðreisnar, hafi látið vinna skýrslu um málið, sem veiðigjaldalöggjöfin byggi m.a. á. Breytingar séu til komnar af því að kerfið sé brogað. „Og við viljum nálgast álagningu í tíma og það er vilji til að létta undir með smærri útgerðum,“ sagði Kristján Þór.

Skýrslan sýni að það séu ákveðin fyrirtæki í vanda.

Því svaraði Hanna Katrín til að gagnrýnivert væri að farið væri í þessar aðgerðir á þessu ári, en ekki þegar betur áraði.

„Ég trúi því ekki að þú sért raunverulega þeirri skoðunar að stór sjávarútvegsfyrirtæki eins og HB Grandi þurfi á aðstoð að halda,“ sagði hún. „Þetta er flöt lækkun, ekki sértæk aðgerð.“

 „Við ræðum ekki svona mál í fundarstjórn forseta í fjóra tíma,“ svaraði Kristján Þór þá og vísaði þar til þess hve langan tíma umræða um málið tók í þinginu á fimmtudag.

Spurður hvort það sé ekki einfaldlega mikil andstaða hjá Sjálfstæðisflokknum við veiðigjöld, sem séu í raun auka skattur á sjávarútveginn, sagði hann svo ekki vera.

„Ég tel samstöðu um í þjóðfélaginu að það sé gert,“ sagði ráðherra. „Það hefur hins vegar ekki verið gert í annarri grein og [við] erum enn að þrasa um hversu hátt eða lágt það eigi að vera.“

Tengdar fréttir

Veiðigjöld

Milljarðar greiddir í veiðigjald

• 23 prósenta aukning veiðigjalda
• „Eins og að pissa í skóinn sinn“
• Veiðigjaldið skili 14,3 milljörðum
• „Er þetta réttlát skipting?“

» Fleiri tengdar fréttir

Þinglok sumar 2018

Persónuupplýsingar eign einstaklinganna

• Frumvarp um persónuvernd samþykkt
• Rafrettufrumvarpið samþykkt
• Þinglok í uppnámi
• Umræðu um veiðigjöld hvergi nærri lokið

» Fleiri tengdar fréttir

• Blogga um frétt