Sandsíli ríkjandi fæða um allt land

„Við vorum að klára seinna lundarallið í Stórhöfða í Vestmannaeyjum og eru 46% unga enn á lífi. 90% af ungunum sem ekki komast á legg, deyja fyrstu 10 dagana frá klaki, þannig að ég reikna með að mesta fækkunin sé yfirstaðin.“

Þetta segir Erpur Snær Hansen, starfandi forstöðumaður Náttúrustofu Suðurlands, í Morgunblaðinu í dag. Hann segir ábúðina í Höfðanum nú 73%, sem séu góðar fréttir. Varpárangurinn sé 0,46 ungar/egg og viðkoman sé því 0,33 ungar/varpholu, sem sé svipað og í fyrra.

„Ef allt heldur sem horfir erum við að sjá svipaðan pysjufjölda og var í fyrra. Þá var hann 4.800 pysjur,“ segir Erpur Snær sem reiknar með því að skoða varpholur í Eyjum um miðjan ágúst. Hann segir sandsíli ríkjandi fæðu lundans um allt land.