Ræddu sjálfbæra stjórnun auðlinda hafsins

Í ræðu sinni á 23. ráðstefnu sjávarútvegsráðherra Norður-Atlantshafsins lagði Kristján Þór Júlíusson, sjávarútvegs- og landbúnaðarráðherra, sérstaka áherslu á sjálfbæra nýtingu og vernd hafsvæða og mikilvægi þess að þjóðir við Norður-Atlantshaf komi sér saman um hvernig nýta megi deilistofna með sjálfbærum hætti. Frá þessu er greint á vef Stjórnarráðsins.

Ráðstefna sjávarútvegsráðherra Norður-Atlantshafsins fór fram í 23. sinn í Þórshöfn í Færeyjum 27. og 28. ágúst. Kristján Þór sat ráðstefnuna ásamt fulltrúum Færeyja, Kanada, Noregs, Rússlands, Grænlands og Evrópusambandsins fyrir hönd aðildarríkja þess.

Þema ráðstefnunnar að þessu sinni var Sjálfbær stjórnun auðlinda hafsins, en ráðstefnurnar hafa nýst vel sem umræðuvettvangur fyrir ráðherrana um fiskveiði og fiskveiðistjórnun í gegnum árin. Kristján Þór lagði jafnframt áherslu á mikilvægi hafrannsókna, og að efling þeirra væri í stjórnarsáttmála ríkisstjórnar Íslands, í ræðu sinni.

Á þriðjudag átti Kristján Þór tvíhliða fund, en hann sat meðal annarra Karmena Vella, framkvæmdastjóri umhverfis- og sjávarútvegsmála Evrópusambandsins. Til umræðu á fundinum var meðal annars samningur um nýtingu fiskistofna í Norður-Íshafi, sem verður staðfestur af ráðherrum ríkjanna í Ilullisat í Grænlandi í október, og tvíhliða fiskveiðasamningur Íslands og ESB og framtíð hans.

Í lok ráðstefnunnar var tilkynnt að 24. ráðstefna sjávarútvegsráðherra Norður-Atlantshafsins fari fram á Íslandi á næsta ári.

• Blogga um frétt