Gagnrýna tafir vegna laxeldisleyfa

Bæjarráð Fjarðabyggðar hefur ítrekað fyrri bókun sína um útgáfu leyfa í tengslum við laxeldi.

Fram kemur í ályktun bæjarráðs á fundi í gær að tafir við leyfisveitingu séu farnar að bitna mjög á þeirri starfsemi sem hefur verið í uppbyggingu í Reyðarfirði síðustu ár.

„Fyrirhuguð 10.000 tonna viðbótarframleiðsla á laxi í Reyðarfirði hefur verið til meðferðar í stjórnsýslunni frá árinu 2012. Það er óásættanlegt að fyrirtæki sem vill fjárfesta í atvinnuuppbyggingu sé búið að vera í umsóknarferli í sex ár án þess að niðurstaða sé í sjónmáli og virðist að greinin sitji ekki við sama borð hér og í öðrum landsfjórðungum,“ segir í ályktuninni.

„Eðlilegt er að sú umsókn taki mið af lögum og reglum sem í gildi eru og þeim gögnum sem þegar hefur verið aflað og lögð fram.“

Reyðarfjörður. mbl.is/Golli

Fram kemur að í samræmi við ályktun SSA leggi Fjarðarbyggð áherslu á mikilvægi þess að skapa heilbrigt og hvetjandi umhverfi fyrir fjölbreytta atvinnuuppbyggingu í fjórðungnum. Þannig geti fiskeldi orðið ein af stoðum atvinnulífsins í Fjarðabyggð.

„Bæjarráð Fjarðabyggðar hvetur stjórnvöld til þess að afgreiða þau mál sem beðið hafa afgreiðslu um árabil og hafa verið tafin ítrekað á grundvelli afturvirkni og jafnvel ólögmætra sjónarmiða.“

Bæjarráð ætlar einnig að óska eftir fundi með sjávarútvegs- og landbúnaðarráðherra um laxeldi í Fjarðabyggð.

• Blogga um frétt