Smíði hafin á nýrri Vestmannaey
Setja bókamerki
Smíði er hafin á nýju skipi Bergs-Hugins ehf., sem koma mun í stað Vestmannaeyjar VE og kemur til með að bera sama heiti. Þá er undirbúningur hafinn að smíði nýrrar Bergeyjar VE, en norska skipasmíðastöðin Vard hefur umsjón með smíði beggja skipanna.
200 mílur greindu frá ákvörðun Síldarvinnslunnar, móðurfélags Bergs-Hugins, um endurnýjun skipanna í desember síðastliðnum.
Skipin sem um ræðir verða 28,95 metrar að lengd og 12 metrar að breidd, og í þeim verða tvær aðalvélar með tveimur skrúfum og einnig ný kynslóð rafmagnsspila frá Seaonics. Skipin verða vel búin í alla staði og munu hafa íbúðir fyrir 13 manns og taka um 80 tonn af ísuðum fiski í lest. Þá hefur verið vandlega hugað að orkunýtingu við hönnun skipanna, að því er fram kemur á vef Síldarvinnslunnar. Vinnuaðstaða sjómanna er þar sögð sérstaklega höfð í huga við hönnun á vinnsludekki og öll áhersla lögð á góða meðhöndlun á fiski og öfluga kælingu.
Guðmundur Alfreðsson, viðhaldsstjóri Síldarvinnslunnar, er nýlega kominn frá Noregi en hann mun þar fylgjast vel með öllu er lýtur að hönnun og smíði skipanna.
„Skipin eru smíðuð í einingum og fer smíði þeirra fram í skipasmíðastöðinni Salthammer í Tesfjord. Þaðan eru einingarnar dregnar á pramma til Aukra þar sem þær verða settar saman og allri vinnu við smíðina verður lokið þar,“ er haft eftir Guðmundi á vef Síldarvinnslunnar.
Afhent næsta sumar
„Allir þættir við smíði skipanna eru boðnir út og síðan koma starfsmenn þeirra fyrirtækja sem fá verkefnin til Aukra og vinna í þeim þar. Þannig eru einstakir hlutar skipanna smíðaðir víða en öll samsetning á sér stað í Aukra auk þess sem eitt skipanna verður að öllu leyti smíðað þar. Skrokkar okkar skipa verða smíðaðir í Salthammer og settir saman í Aukra en skrokkar fjögurra skipa verða hins vegar smíðaðir í Vietnam,“ segir Guðmundur.
„Þegar smíðinni í Vietnam verður lokið verða skrokkarnir fluttir þaðan til Aukra og þar verða skipin síðan fullfrágengin. Nú liggur fyrir að afhending á nýrri Vestmannaey og Bergey dregst lítils háttar frá því sem ráð var fyrir gert. Nú er gert ráð fyrir að Vestmannaey verði afhent í maí 2019 og Bergey í júní.“
„Börn heima sem maður myndi vilja hafa í skjóli“
Fyrsti blaðamannafundurinn í heild sinni
Samfylking og Viðreisn gáfu loforð
„Aðstæður í stjórnmálum geta breyst á einni nóttu“
„Tímabil aukinnar eldvirkni“
Bjarni: „Útilokað að þetta geti gengið upp“
„Mér finnst gamla Samfylkingin komin aftur“
Beint: Ný ríkisstjórn tekin við völdum
