Dagur þorsksins í Húsi sjávarklasa

Á miðvikudag í næstu viku, 3. október, verður í Húsi sjávarklasans efnt til Dags þorsksins í þriðja sinn. Hús sjávarklasans verður þá opnað öllum áhugasömum og fjöldi íslenskra fyrirtækja mun kynna þær fjölmörgu afurðir sem framleiddar eru úr þorskinum hér á landi og þá tækni sem þróuð hefur verið til að hámarka nýtingu og gæði afurðanna.

Skipulögð dagskrá verður vítt og breitt um Hús sjávarklasans frá kl. 14 til 17 og munu gestir meðal annars fá tækifæri til að smakka fjölda ólíkra matvæla og fæðubótarefni, kynnast fyrirtækjum og frumkvöðlum í ólíkum geirum, allt frá hátækniiðnaði til fatahönnunar. Um 30 fyrirtæki munu sýna afurðir sínar og tækni og bjóða gestum upp á ýmislegt góðgæti og frumlega rétti.

Þorskurinn skilar miklu til þjóðarbúsins. mbl.is/Sigurður Bogi

Tekjurnar minnst 100 milljarðar kr. 

Þorskurinn, afurðir hans og tækni tengd veiðum og vinnslu hans standa undir útflutningstekjum sem nema minnst 100 milljörðum króna á ári. Með því að halda Dag þorsksins er ætlunin að minna á mikilvægi þorskins fyrir Ísland fyrr og nú, sýna gestum þá ótrúlega fjölbreyttu flóru afurða sem unnar eru úr þorskinum og hvað íslenskum fyrirtækjum og rannsókna- og háskólasamfélaginu hefur tekist vel til við að hámarka gæði, nýtingu og afurðaverð þessarar mikilvægu auðlindar, segir í fréttatilkynningu,

Þá mun veitingastaðurinn Bergsson RE sem staðsettur er í húsi sjávarklasans og sjávarréttaveitingastaðir í Granda mathöll og Hlemmi mathöll vera með þorskinn í forgrunni á matseðli sínum þennan dag.  

• Blogga um frétt