„Þetta er miklu einfaldara og auðskiljalegra. Við erum að einfalda stjórnsýsluna og færa álagningu veiðigjalds nær í tíma,“ segir Kristján Þór Júlíusson, sjávarútvegs- og landbúnaðarráðherra, um nýtt frumvarp um veiðigjöld sem hann hefur lagt fram á Alþingi.

Kristján Þór segir að nauðsynlegt sé að koma málunum fyrir í betra horfi. „Það að ríkisskattstjóri taki að sér þetta hlutverk í framtali er meðal annars spurning um aukið gagnsæi og öryggi í meðferð upplýsinga.“

Frétt af mbl.is

Álagning veiðigjalda færist nær í tíma

Álagning veiðigjalda, upplýsingaöflun og meðferð upplýsinga verður í höndum ríkisskattstjóra verði frumvarpið að lögum. „Svo kemur fiskistofa sömuleiðis þar inn og verða þetta tvær meginstofnanirnar. Þá styðjumst við ekki lengur við skýrslu Hagstofunnar um hag veiða og vinnslu og ekki heldur við veiðigjaldsnefnd. Þarna erum við búin að færa þetta undir stofnanir ríkisins. Þá verður öll umsýsla og umgjörð öruggari og betri.“

Á von á sátt um regluverkið en ekki upphæðina

Spurður um samráð við hagsmunaaðila segir Kristján Þór að áherslur þeirra hafi komið vel í ljós á liðnum árum og ekki síst í tengslum við umræðurnar sem fram fóru í tengslum við það frumvarp sem lagt var fram í vor en varð ekki að lögum.

„Hagsmunaaðilum mun einnig  gefast kostur á því núna að fá kynningu á frumvarpinu í ráðuneytinu, að koma fyrir þingnefndina og senda henni umsagnir, með sínum sjónarmiðum og röksemdum. Hagsmunaaðilar, ásamt öllum öðrum í þjóðfélaginu, munu hafa færi til þess að gera athugasemdir við frumvarpið,“ segir Kristján Þór, sem hyggur á fundaferð um landið í október, þar sem hann mun ræða við hagsmunaaðila.

Gildandi lög um veiðigjöld renna út um áramótin og þarf nýtt frumvarp því að taka gildi 1. janúar 2019. Kristján Þór er bjartsýnn á að sátt verði um regluverkið sjálft en á von á því að skiptar skoðanir verði um upphæð gjaldsins. „Ég vonast eftir því að við getum náð ágætlega saman um það hvernig við ætlum að reikna gjaldið út, sem ég held að þetta frumvarp gefi alveg fullt færi til. Svo getum við og munum örugglega hafa eðlilega skiptar skoðanir um þá fjárhæð sem atvinnugreininni er ætlað að greiða af fiskveiðaauðlindinni.“

Tengdar fréttir

Veiðigjöld

Brim og Samherji greiddu 19% veiðgjalda

• Veiðigjöldin tæpir 11 milljarðar í fyrra
• Lýsa áhyggjum af áformum ríkisstjórnar
• Hærra gjald gæti leitt til lokana
• Óásættanlegt að taka atvinnu af öðrum

» Fleiri tengdar fréttir

• Blogga um frétt