Tækifæri fyrir Ísland sem gestaþjóð

„Hefð er fyrir því að ráðstefnuhaldarar útnefni eina gestaþjóð fyrir hverja ráðstefnu, og núna kemur það í hlut okkar. Við ætlum okkur að kýla á þetta tækifæri og höfum sett saman sérstakan stýrihóp til að halda utan um okkar framlag, eftir að hafa ráðfært okkur við gestaþjóðir undanfarinna ára,“ segir Guðný í samtali við 200 mílur.

Sveinn Margeirsson, forstjóri Matís, hefur verið skipaður formaður stýrihópsins, en sérstakur landstengill Íslands við ráðstefnuna er Kristján Davíðsson, framkvæmdastjóri Landssambands fiskeldisstöðva.

150 fyrirlesarar í 16 málstofum

Á ráðstefnunni er megináhersla lögð á málefni Norður-Atlantshafsins, þar sem farið er yfir stefnumarkandi málefni, nýsköpun, fjármál, sjálfbærni, framboð og markaðsmál í sjávarútvegi þeirra þjóða sem búa við þetta víðfeðma haf. Samkvæmt dagskránni í ár munu 150 fyrirlesarar halda erindi í alls sextán málstofum.

„Við höfum sótt þessa ráðstefnu í nokkuð mörg ár,“ segir Guðný og bendir á að Marel og Skaginn 3X hafi lagt mikið upp úr sterkri viðveru í Björgvin. „Svo hafa verið íslenskir fyrirlesarar, til dæmis frá HB Granda, Icelandic og Iceland Seafood International, svo dæmi séu nefnd, auk þess sem Þorgerður Katrín Gunnarsdóttir, þáverandi sjávarútvegsráðherra, opnaði málstofu á ráðstefnunni árið 2017.

Við gerum ráð fyrir að sjá áfram fyrirlesara inni í megindagskránni, en nú verður sú nýbreytni að Ísland verður með sérstaka málstofu síðdegis á svokölluðum degi núll, eða 5. mars. Á henni verður fjallað um forystuhlutverk Íslands í sjávarútvegi á alþjóðavísu og aukna verðmætasköpun sem byggist á sjálfbærni, gæðum og nýsköpun.“

Ekki beinlínis söluráðstefna

Íslandsstofa stóð fyrir kynningarfundi fyrr í mánuðinum í húsakynnum sínum að Sundagörðum 2, þar sem fram kom að þátttaka Íslands sem gestaþjóðar veitti íslenskum fyrirtækjum gott tækifæri til að byggja upp viðskiptatengsl og kynna vörur sínar og þjónustu fyrir hagsmunaaðilum í sjávarútvegi erlendis, þar sem ráðstefnuna sæki áhrifafólk úr geiranum.

„Þetta er ekki beinlínis söluráðstefna, heldur er þetta í raun staður þar sem þeir sem taka ákvarðanir í sjávarútvegi koma saman, hvort sem er til að ræða stöðu á fiskistofnum, sjálfbærni, þróun á mörkuðum, innkaup á tækjum til vinnslu og veiða eða innkaup á sjávarafurðum. Við viljum því sameina aðila hérlendis og standa þétt saman að baki skilaboðum um hvað íslenskur sjávarútvegur hefur fram að færa,“ segir Guðný.

Tækifæri fyrir tæknifyrirtæki

„Við ætlum að leggja mikið upp úr kynningu á íslensku fyrirtækjunum í aðdraganda ráðstefnunnar. Venju samkvæmt gefum við út kynningarhefti en í ár ætlum við líka að gefa út svokölluð örmyndskeið, þar sem allir þátttakendur frá Íslandi geta fengið framleitt og birt sérstakt myndskeið til kynningar á sér og sinni starfsemi.“

Guðný bendir enn fremur á að fyrir tæknifyrirtæki geti leynst ýmis tækifæri á ráðstefnunni, enda sé norskur sjávarútvegur einn af þeirra helstu mörkuðum. „Þó að þetta sé auðvitað alþjóðlegur viðburður þá vitum við að þarna verður töluverður fjöldi Norðmanna úr geiranum.“

Fyrirtækin greiða Íslandsstofu gjald sem fer í kynningarstarf og þess háttar, en svo fá fulltrúar sem taka þátt frá gestaþjóðinni hverju sinni 30% afslátt af ráðstefnugjaldinu. „Útlit er fyrir ágæta þátttöku af hálfu Íslands og ljóst er að greinin ætlar að koma inn í þetta verkefni af krafti. Við erum þó alltaf í leit að fleiri þátttakendum,“ segir Guðný.

Mikilvægt að tryggja góða þátttöku

Stella Björg Kristinsdóttir, markaðsstjóri Marel fyrir fiskiðnað, segir að mikilvægt sé að tryggja góða þátttöku í ráðstefnunni á meðal íslenskra fyrirtækja. „Markmiðið er að auka vitund um Ísland sem leiðandi sjávarútvegsþjóð á alþjóðavísu, og sýna um leið fram á framúrskarandi stöðu Íslands í sjálfbærri nýtingu auðlinda sjávar,“ segir Stella í samtali við 200 mílur.

„Þarna verður Ísland sýnt sem áhugaverður viðskiptaaðili vegna þekkingar, gæða og nýsköpunar í framleiðslu afurða, tækni og þjónustulausna. Þeim mun fleiri fyrirtæki sem taka þátt, þeim mun stærra tækifæri gefst okkur til að þjappa íslenskum sjávarútvegi saman, koma fram með sameiginleg skilaboð og auka slagkraft í kynningu á Íslandi, sem allir eiga að geta notið góðs af.“