Mikilvægi fiskeldis í uppbyggingu byggða á Vest- og Austfjörðum er staðreynd og ætti ekki að vera ágreiningsmál. Þetta segir Sigurður Ingi Jóhannsson, samgöngu- og sveitarstjórnarráðherra, í stöðuuppfærslu á Facebook í dag. Hann segir það mega vera öllum ljóst að finna þurfi skynsamlegar lausnir á núverandi stöðu.

Sigurður Ingi segir að fram til ársins 2012 hafi verið viðvarandi fólksfækkun á sunnanverðum Vestfjörðum, en að þá hafi þróunin snúist við vegna uppbyggingar fiskeldis. Þar séu á bilinu 160 og 170 bein störf hjá fyrirtækjum í fiskeldi og um 150 óbein störf. Þá hafi íbúaþróun á norðanverðum Vestfjörðum snúist við á síðasta ári, meðal annars vegna fiskeldis, og fiskeldi haft jákvæð áhrif á íbúaþróun byggða á sunnanverðum Austfjörðum.

„Það er mikilvægt að allir átti sig á raunstöðunni og mikilvægi þess að atvinna sé til staðar. Í öðrum löndum höfum við séð nákvæmlega sömu þróun – þ.e. að svæði sem áður máttu þola fólksfækkun hafa nú snúið við með uppbyggingu fiskeldis á þeim svæðum.“

Hann segir alla sammála um mikilvægi þess að byggja fiskeldið upp á varkárinn og sjálfbæran hátt. „Það er heldur ekkert óeðlilegt að á einstökum atvinnugreinum séu skiptar skoðanir en það verður að gera þá kröfu til þeirra sem um málin fjalla að þeir fari ekki með rangt mál – jafnvel staðlausa stafi.“ 

Tengdar fréttir

Fiskeldi

Arnarlax brýtur 100 þúsund tonna múrinn

• Slátrað úr kvíum við Haukadalsbót
• Fordæmalaus andstaða ekki í vegi eldis
• Sveiflukennt ár fyrir laxeldið
• Fyrstu seiðin komin í Viðlagafjöru

» Fleiri tengdar fréttir

• Blogga um frétt