Eðlilegt að löggjöfin sé lagfærð
Setja bókamerki
Lilja Rafney Magnúsdóttir, þingmaður VG og formaður atvinnuveganefndar Alþingis, telur eðlilegt að löggjöf í kringum fiskeldi sé lagfærð miðað við þá ágalla sem hafa komið fram í ógildingarmáli starfs- og rekstrarleyfa Arctic Sea Farm hf. og Fjarðalax hf. Þetta sagði hún í samtali við mbl.is eftir fund með sjávarútvegsráðherra og þingmönnum ríkisstjórnarflokkanna, þar sem kynnt var lagafrumvarp um breytingu á lögum um fiskeldi.
Frumvarpið, sem verður lagt fyrir Alþingi sem allra fyrst, að sögn ráðherra, gerir ráð fyrir að í þeim tilvikum sem rekstrarleyfi er fellt úr gildi geti ráðherra að fenginni umsögn Matvælastofnunar gefið út rekstrarleyfi til bráðabirgða til allt að tíu mánaða.
Hefði mátt lagfæra fyrr
„Þetta er eitthvað sem eðlilegt er að ráðherra hafi möguleika á því hann er ábyrgðarmaður í þessum málaflokki,“ segir Lilja Rafney.
„Þetta er eitthvað sem hefði kannski átt að vera búið að koma í ljós áður, og hefði þurft að laga alveg burtséð frá þessu tiltekna máli,“ segir Lilja. „Þessi löggjöf miðast ekki við einhver einstök fyrirtæki, en við þessa málsmeðferð alla hefur komið í ljós að þarna eru hlutir sem þarf að laga.“
Fundur á morgun
Atvinnuveganefnd mun funda klukkan átta í fyrramálið, m.a. um fiskeldismálin, og verða gestir á fundinum fulltrúar Skipulagsstofnunar, Matvælastofnunar og Umhverfisstofnunar.
„Þetta verður rætt í samhengi við annað. Það var búið að óska eftir fundi um þessi [fiskeldismál] í heild sinni og að starfsleyfin hefðu með úrskurði úrskurðarnefndarinnar verið felld úr gildi. Það er verið að uppfylla þá ósk nefndarmanna en svo er þetta mál komið upp núna, sem við þurfum líka að fjalla um. Það er þó auðvitað ekki búið að mæla fyrir málinu á Alþingi en það fer vonandi í útbýtingu sem fyrst,“ segir Lilja.
Aðspurð sagðist hún ekki geta spáð fyrir um meðferð málsins í þinginu á morgun en vonaðist, málsaðila vegna, að málið geti gengið vel fyrir sig.
Maskína: Framsókn í fallbaráttu
Drónamyndskeið frá hápunkti gossins í nótt
Mjög alvarlegt ef Njarðvíkuræð gefur sig
Virknin dregist saman um 600 metra
„Má segja að þetta gos hafi þjófstartað“
Hótar Bretum og Bandaríkjamönnum