Kristján Þór Júlíusson, sjávarútvegs- og landbúnaðarráðherra, mun á morgun leggja fram á Alþingi frumvarp til laga um breytingar á lögum um fiskeldi. Frumvarpið gerir ráð fyrir að í þeim tilvikum sem rekstrarleyfi er fellt úr gildi geti ráðherra að fenginni umsögn Matvælastofnunar, enda mæli ríkar ástæður með, gefið út rekstrarleyfi til bráðabirgða til allt að tíu mánaða.

Í tilkynningu frá atvinnu- og nýsköpunarráðuneytinu segir að frumvarpinu sé ætlað að lagfæra með almennum hætti annmarka á lögum um fiskeldi til framtíðar. Sá annmarki birtist í því að samkvæmt gildandi lögum er eina úrræði Matvælastofnunar í þeim tilvikum sem rekstrarleyfi fiskeldisstöðvar er fellt úr gildi að stöðva starfsemi hennar.

Frumvarpið er lagt fram eftir að úrskurðarnefnd um umhverfis- og auðlindamál ógilti bæði starfs- og rekstrarleyfi Fjarðalax og Arnarlax fyrir fiskeldi í Patreksfirði og Tálknafirði.

Samkvæmt frumvarpinu getur ráðherra sett rekstrarleyfi til bráðabirgða þau skilyrði sem þörf er á svo tilgangur leyfisins náist, m.a. um samdrátt þeirrar starfsemi sem þegar er fyrir hendi, um tímafresti vegna úrbóta eða ef um meðferð máls fyrir dómstólum er að ræða.

Frumvarpið hefur verið kynnt þingflokkum stjórnarflokkanna. 

Tengdar fréttir

Fiskeldi

Arnarlax brýtur 100 þúsund tonna múrinn

• Slátrað úr kvíum við Haukadalsbót
• Fordæmalaus andstaða ekki í vegi eldis
• Sveiflukennt ár fyrir laxeldið
• Fyrstu seiðin komin í Viðlagafjöru

» Fleiri tengdar fréttir

• Blogga um frétt