Stjórn HB Granda ræðir bréfið frá ÚR
Setja bókamerki
Tengdar fréttir
Kaup HB Granda á Ögurvík
Stjórn HB Granda mun koma saman til fundar á fimmtudag og ræða bréf framkvæmdastjóra Útgerðarfélags Reykjavíkur, stærsta hluthafa HB Granda, til fyrirtækisins, og um leið þá tillögu sem þar kemur fram, um að hætta við viðskiptin með alla hluti í Ögurvík að sinni.
Þetta kemur fram í tilkynningu sem HB Grandi hefur sent kauphöllinni.
Útgerðarfélag Reykjavíkur, sem áður hét Brim, keypti fyrr á þessu ári 34% hlut í HB Granda fyrir rúmlega 21 milljarð. Síðar var tilkynnt um þau áform HB Granda að kaupa Ögurvík af ÚR, sem er eins og fyrr segir stærsti eigandi HB Granda. Eigandi ÚR er Guðmundur Kristjánsson, en hann er jafnframt forstjóri HB Granda. Kaupverðið var 12,3 milljarðar króna en það byggðist á niðurstöðum tveggja óháðra matsmanna.
Fyrr í dag var greint frá því að Útgerðarfélag Reykjavíkur vilji ekki lengur selja Ögurvík til HB Granda.
Stjórn HB Granda hafði áður samþykkt kaupin á Ögurvík, en lífeyrissjóðurinn Gildi, einn stærsti hluthafi HB Granda, lagði í gær fram tillögu að bókun fyrir hluthafafund félagsins sem haldinn verður 16. október, um að fá fyrirtækjaráðgjöf Kviku til að meta kaupin og skilmála þeirra.
Ekki hafi tekist að eyða öllum efasemdum
Í bréfi sem Runólfur Viðar Guðmundsson, framkvæmdastjóri ÚR, sendi til HB Granda og var birt á vef Kauphallarinnar, kemur fram að ÚR telji að í ljósi reynslu, þekkingar og kunnáttu af minnihlutavernd og deilum við hluthafa sé rétt að hætta við viðskiptin með Ögurvík að þessu sinni. Segir í bréfinu að ljóst sé að ekki hafi tekist að eyða öllum efasemdum um að viðskiptin séu gerð á grundvelli armslengdarsjónarmiða og að það sé einlægur vilji forsvarsmanna ÚR að starfa í sátt, samlyndi og án átaka við aðra hluthafa félagsins.
„ÚR telur það ekki skynsamlegt að knýja viðskiptin í gegn á þessum tímapunkti gegn efasemdum (vilja) eins af stærri hluthöfum í HB Granda,“ segir í bréfinu.
Örlagaríkur ágreiningur
Fyrr á þessu ári var kannaður grundvöllur fyrir því á vettvangi HB Granda að kaupa Ögurvík. Þá varð ekkert af kaupunum. Samkvæmt heimildum Morgunblaðsins fyrr í haust var það mat stjórnenda HB Granda á þeim tíma að verðmiði upp á ríflega 12 milljarða væri of hár og gæti gert útgerðarfélaginu erfitt um vik að ná arðsemismarkmiðum sínum.
Var það mat félagsins á þeim tíma að ekki væri hægt að réttlæta kaup á Ögurvík fyrir meira en 8 milljarða króna. Það er 4,3 milljörðum lægri fjárhæð en síðar var ákveðið að kaupa fyrirtækið á.
Heimildir Morgunblaðsins hermdu þá einnig að ágreiningur um möguleg kaup á Ögurvík fyrr á þessu ári hafi orðið til þess að Vilhjálmi Vilhjálmssyni, þáverandi forstjóra HB Granda, hafi verið sagt upp störfum. Uppsögnin var kynnt opinberlega 21. júní. Sömu heimildir hermdu að sú atburðarás hafi einnig birst í brotthvarfi Rannveigar Rist en hún sagði sig úr stjórn félagsins 27. júní.
Tengdar fréttir
Kaup HB Granda á Ögurvík
/frimg/1/53/8/1530844.jpg)
Myndir: Náttúrulegur þröskuldur að taka við
Hraunið við bílastæði Bláa lónsins
Hótar Bretum og Bandaríkjamönnum
Litlar líkur á að hraunið nái til mannvirkja
/frimg/1/53/7/1530787.jpg)
Flogið á milli ljósaskipta
Mæðgur dæmdar til að greiða 64 milljónir
/frimg/1/53/8/1530849.jpg)
Fatlaður drengur fær ekki þjónustu í verkfalli