Útgerðarfélag Reykjavíkur, sem áður hét Brim og er stærsti eigandi í HB Granda, segir það vilja sinn að ekki verði farið í viðskipti með sölu félagsins á útgerðarfélaginu Ögurvík. Stjórn HB Granda hafði áður samþykkt kaupin, en lífeyrissjóðurinn Gildi, sem er einn stærsti hluthafi HB Granda, hafði lagt fram bókun fyrir hluthafafund félagsins sem haldinn verður 16. október um að fá fyrirtækjaráðgjöf Kviku til að meta kaupin og skilmála þeirra.

ÚR er eigandi Ögurvíkur og fyrr á þessu ári keypti ÚR 34% hlut í HB Granda fyrir rúmlega 21 milljarð. Síðar var tilkynnt um áform HB Granda að kaupa Ögurvík af ÚR, sem er eins og fyrr segir stærsti eigandi HB Granda. Eigandi ÚR er Guðmundur Kristjánsson, en hann er jafnframt forstjóri HB Granda. Kaup­verðið var 12,3 millj­arðar króna en það bygg­ðist á niður­stöðum tveggja óháðra mats­manna.

Í bréfi sem Runólfur Viðar Guðmundsson, framkvæmdastjóri ÚR, sendi til HB Granda og var birt á vef Kauphallarinnar, kemur fram að ÚR telji, í ljósi reynslu, þekkingar og kunnáttu af minnihlutavernd og deilum við hluthafa, að rétt sé að hætta við viðskiptin með Ögurvík að þessu sinni. Segir í bréfinu að ljóst sé að ekki hafi tekist að eyða öllum efasemdum um að viðskiptin séu gerð á grundvelli armslengdarsjónarmiða og að það sé einlægur vilji forsvarsmanna ÚR að starfa í sátt, samlyndi og án átaka við aðra hluthafa félagsins.

„ÚR telur það ekki skynsamlegt að knýja viðskiptin í gegn á þessum tímapunkti gegn efasemdum (vilja) eins af stærri hluthöfum í HB Granda,“ segir í bréfinu.

Ögur­vík ehf. ger­ir út Vigra RE 71 sem er 2.157 tonna frysti­tog­ari smíðaður árið 1992. Afla­heim­ild­ir fé­lags­ins á fisk­veiðiár­inu sem hófst 1. sept­em­ber 2018 eru 7.680 tonn af botn­fiski og 1.663 tonn af mak­ríl miðað við út­hlut­un árið 2018.

Frétt af mbl.is

Kaup HB Granda á Ögurvík verði skoðuð

Tengdar fréttir

Kaup HB Granda á Ögurvík

Fellir niður athugun á HB Granda

• Heimilar kaup HB Granda á Ögurvík
• Kaup HB Granda á Ögurvík samþykkt
• „Kemur mér ekki á óvart“
• Kaupin hagfelld, séu forsendur raunhæfar

» Fleiri tengdar fréttir

Brim

Stærsta skip flotans heitir nú Þerney

• Brim fjárfesir í vistvænum krapavélum
• Stjórn Brims helst óbreytt
• Hagnaður Brims dróst saman um 20%
• Brim seldi nýkeypt skip vegna veiðibanns

» Fleiri tengdar fréttir

• Blogga um frétt