Sléttbakur er talinn í bráðri útrýmingarhættu og er eina hvalategundin sem á eða hefur átt heimkynni við Ísland, sem þannig er flokkuð. Alls eru sléttbakar í heiminum aðeins taldir vera um 450 talsins og eru heimkynni þeirra að mestu við austurströnd Norður-Ameríku. Við flokkun á nýútkomnum válista spendýra fyrir Ísland var sléttbakurinn upphaflega talinn til flækinga við Ísland.

Þessi flokkun hefur nú verið endurskoðuð með það í huga að fyrr á öldum voru helstu heimkynni í kringum Ísland og dýrið hefur einnig gengið undir heitinu Íslands-sléttbakur var ákveðið að festa lögheimili hans og telja sléttbakinn með dýrum við Ísland.

Nú orðið sést sléttbakur ekki oft við landið, en einn slíkur dvaldi í nokkra daga í Faxaflóa í sumar og hafði sléttbakur þá ekki sést hér við land í fimm ár. Ferðamenn í hvalaskoðun fengu að fylgjast með ferðum og blæstri dýrsins í nokkrum ferðum í júlí í sumar og það var myndað í bak og fyrir.

Gísli Víkingsson, hvalasérfræðingur hjá Hafrannsóknastofnun, gerði nokkrar tilraunir til að sjá sléttbakinn í Faxaflóa, en án árangurs. Hann hafði síðan samstarf við hvalaskoðunarfyrirtækið Eldingu um að senda myndir af dýrinu til Bandaríkjanna þar sem margir hafa miklar áhyggjur af framtíð stofnsins og náið er fylgst með hverju einasta dýri. Viðbrögðin létu ekki á sér standa.

Ítarlega er fjallað um málið í Morgunblaðinu í dag.