Uppbyggingu lóðar á Miðbakka hafnað

Á lóðinni Geirsgötu 11, á besta stað á Miðbakka við Gömlu höfnina Reykjavík, stendur gömul vöruskemma, að mestu ónotuð. Lóðarhafar hafa á undanförnum árum kynnt hugmyndir um niðurrif hússins og uppbyggingu á lóðinni en ekki haft erindi sem erfiði.

Á síðasta fundi stjórnar Faxaflóahafna var samþykkt, að tillögu skipulagsfulltrúa hafnarinnar, að bíða með framkvæmdir og uppbyggingu á Miðbakka þar til framkvæmdum við Austurhöfn lýkur og ljóst með hvaða hætti skipulag umferðar um Austurbakka og starfsemi á jarðhæð verði. Á því svæði sé nú mikið álag vegna byggingarframkvæmda. Þá megi einnig vænta þess að framkvæmdir hefjist norðan Mýrargötu í Vesturbugt, sem einnig kunna að hafa áhrif á umhverfi og starfsemi í Gömlu höfninni.

Í minnisblaði Halldóru Hrólfsdóttur skipulagsfulltrúa kemur fram að lóðarhafinn, sem er Guðmundur Kristjánsson útgerðarmaður, kenndur við Brim, nú forstjóri HB Granda, hafi fengið PKdM arkitekta til að vinna hugmyndir að uppbyggingu lóðarinnar.

Tillagan gerir ráð fyrir allt að 20 þús. fm. byggingum. Teikning/PKdM arkitektar

Byggingar verða 1-6 hæðir

Nýr Miðbakki muni taka mið af sögulegu samhengi við gamla hafnarsvæðið, gömul pakkhús, vöruhús og fiskvinnslu. Einnig við samhengi nýrrar byggðar framúrstefnulegrar byggingarlistar og verði því órjúfanleg heild miðborgarinnar. Gert er ráð fyrir 1-6 hæða byggingum á lóðinni Geirsgötu 11. Samkvæmt tillögunni er gert ráð fyrir mjög miklu byggingarmagni á lóðinni eða allt að 14.500 fermetrum ofanjarðar (nýtingarhlutfall 3,0) og 4.805 fermetrum neðanjarðar. Lóðin Geirsgata 11 er alls 4.805 fermetrar og byggingarmagn í dag 2.573 fermetrar (nýtingarhlutfall 0,5).

Ítarlega er fjallað um málið á síðu 26 í Morgunblaðinu í dag.

Húsið við Geirsgötu 11 var byggt 1982 og er nú að mestu ónotað.