Meira veiddist af makríl utan lögsögu

Í fyrsta skipti síðan makrílveiðar hófust af krafti hér við land veiddist meira en helmingur aflans utan íslenskrar lögsögu á nýlokinni vertíð, að því er fram kemur á heimasíðu Landssambands smábátaeigenda.

Örn Pálsson, framkvæmdastjóri LS, gerði þróun makrílveiða hér við land að umræðuefni á aðalfundi LS í síðustu viku og hvatti stjórnvöld til að gefa færaveiðar smábáta frjálsar, öll höft á veiðarnar við strendur landsins væru óþörf. Þar sem uppsjávarskipin þyrftu í vaxandi mæli að leita á mið utan landhelginnar til að ná heimildum sínum ætti að efla færaveiðar eins mikið og hægt væri, að því er segir á heimasíðu LS.

Alls veiddu smábátar 3.751 tonn af makríl á árinu 2018 og nam aflaverðmæti þess um 250 milljónum. Hlutdeild smábáta í því sem veiddist í landhelginni var 6%.

Í ályktun aðalfundar LS um makríl er lagt til að reglugerð sem gefin var út fyrir fjórum árum verði felld úr gildi og heildarúthlutun til smábáta verði 16% af heildinni. Ennfremur er lagt til að „leigupottur makríls (ráðherrapottur) verði festur í sessi og að ónýttar makrílveiðiheimildir umfram leyfilega tilfærslu milli ára verði færðar sem viðbót við leigupott næstu makrílvertíðar“.