Sætti sig ekki við „blóðmjólkun“
Setja bókamerki
Tengdar fréttir
Samdráttur í sjávarútvegi
„Ef menn eru að kaupa fyrirtæki í skuldsettum yfirtökum, og ætla sér síðan að blóðmjólka þau í framhaldinu til að greiða kaupverðið – það er eitthvað sem ég get ekki séð að við í lífeyrissjóðunum munum sætta okkur við.“
Þetta segir Sverrir Mar Albertsson, framkvæmdastjóri Afls starfsgreinafélags, um uppsagnir 11 starfsmanna HB Granda á Vopnafirði sem tilkynntar voru í dag.
Hann segir að þeir sem sitji í stjórnum lífeyrissjóða fyrir verkalýðsfélögin eigi að beita sér harðar fyrir því að fyrirtæki og stjórnendur þeirra axli meiri ábyrgð.
„Lífeyrissjóðir fólksins, sem vinnur þessi störf, eiga orðið stóran hlut í þessum fyrirtækjum. Þess vegna er alveg ljóst að við munum krefjast skýrra svara,“ segir Sverrir í samtali við 200 mílur.
„Við munum beita okkur innan stjórna lífeyrissjóðanna um að setja auknar kröfur á fyrirtækin um að þau axli samfélagslega ábyrgð.“
„Eiga fyrirtækin að borga kaupverðið sjálf?“
Skammt er síðan Útgerðarfélag Reykjavíkur, þá Brim, keypti 34,1% eignarhlut Kristjáns Loftssonar og Halldórs Teitssonar í HB Granda og varð með því stærsti hluthafi félagsins. Guðmundur Kristjánsson, aðaleigandi Útgerðarfélags Reykjavíkur, er forstjóri HB Granda.
„Ef að þessar uppsagnir eru gerðar í hagræðingarskyni til að hámarka hagnað eigenda, þá hlýtur maður að doka við og spyrja; eiga menn að kaupa þessi fyrirtæki fyrir eigið fé eða eiga fyrirtækin að borga upp kaupverðið sjálf?“ segir Sverrir og bendir á að hann sitji í stjórn lífeyrissjóðsins Stapa. Þar muni hann taka málið upp.
„Við eigum þar hlut í HB Granda og væntanlega munum við kanna hvort við getum kallað eftir svörum sem hluthafi, hverju þessar uppsagnir sæti.“
Lög um fjöldauppsagnir gildi
Samkvæmt upplýsingum frá Afli eru flestir þeirra sem sagt hefur verið upp af erlendum uppruna og búa á Bakkafirði. Heimildir félagsins eru þá sagðar herma að hætt hafi verið við frekari uppbyggingu HB Granda á Vopnafirði.
„Mér sýnist samkvæmt okkar tölum að um það bil hundrað manns starfi í frystihúsinu. Við viljum meina að lög um fjöldauppsagnir gildi í þessu tilviki en það er eitthvað sem þarf að fara yfir, því lögin fjalla um fyrirtæki en við viljum horfa á þetta út frá starfsstöðvum,“ segir Sverrir.
HB Grandi tapaði 252 þúsundum evra á öðrum ársfjórðungi, samkvæmt árshlutauppgjöri sem gert var opinbert á vef fyrirtækisins í lok ágúst. Guðmundur Kristjánsson, forstjóri HB Granda, sagði tapið, sem nam um 30 milljónum króna, „óviðunandi“.
Tengdar fréttir
Samdráttur í sjávarútvegi
Betri starfsandi á Íslandi
„Alls ekki beint gagnvart börnum eða unglingum“
Bóksali ósáttur við skipuleggjendur Menningarnætur
Þrjú hús rýmd vegna aurskriðu á Húsavík
Samfélag í sorg og áfallið mikið
„Eins og hver annar dagur hjá okkur“
Rigningin tætti í sig hlíðina við Hofsá
Grunur um manndráp?