Hefja flutningasiglingar frá Bíldudal

Samskip og Arnarlax hafa skrifað undir samstarfssamning um að Samskip annist útflutning á afurðum Arnarlax frá Bíldudal og innflutning á aðföngum fyrir fyrirtækið. Siglingarnar hófust í gær, þegar Skálafell kom í sína fyrstu ferð til Bíldudals. Langt er um liðið síðan þaðan hafa verið beinar millilandasiglingar.

Þetta kemur fram í tilkynningu frá Samskipum, en samkvæmt henni mun flutningur fyrir Arnarlax fara inn á svonefnda Suðurleið í nýju siglingakerfi fyrirtækisins.

Flutningaskip Samskipa muni þar með hafa vikulega viðkomu á Bíldudal á miðvikudögum. Þaðan verði siglt um Reykjavík og komið til Hull í Bretlandi á sunnudögum. Þaðan verði svo siglt áfram til Rotterdam og komið þangað á mánudegi.

Binda miklar vonir við nýju þjónustuna

Suðurleið Samskipa er sögð falla vel að þörfum Arnarlax og annarra sem flytja vilja ferskar afurðir til og frá Bretlandi og meginlandi Evrópu.

„Við bindum miklar vonir við þessa nýju þjónustu sem við getum nú boðið útflytjendum á ferskum fiski,“ er haft eftir Birki Hólm Guðnasyni, forstjóra Samskipa á Íslandi.

„Við fögnum því sérstaklega að fá Arnarlax í viðskipti og að geta nú boðið fyrirtækjum á Vestfjörðum afburðatengingu við mikilvæga markaði í Evrópu og þaðan áfram um allan heim í viku hverri.“

Fersk vara á kröfuharða markaði

Kristian Matthíasson, forstjóri Arnarlax, segir samninginn mikilvægan þátt í áframhaldandi uppbyggingu fyrirtækisins.

„Við afhendum ferska hágæðavöru inn á kröfuharða markaði og erum þar að keppa við fyrirtæki sem eru stærri og nær markaðnum. Þá er gríðarlega mikilvægt að flutningsleiðin sé bæði örugg, fagleg og hagkvæm.“

• Blogga um frétt