Vill jöfn skipti í verðmætum

Tekist var á um fiskveiðisamninga Íslands og Færeyja á fundi embættismanna í Kaupamannahöfn nýlega, en Íslendingar vilja gera breytingar á þeim samningum sem í gildi hafa verið.

Kristján Þór Júlíusson sjávarútvegsráðherra segir að hann vilji nálgast þessar viðræður þannig að um jöfn skipti á verðmætum verði að ræða, en nú halli á Íslendinga í þeim efnum.

Færeyingar hafa nú heimild til að veiða hér við land 5.600 tonn af bolfiski og 5% af útgefnum heildarloðnukvóta við Ísland, þó að hámarki 25 þúsund tonn. Á móti hafa Íslendingar rétt til að veiða kolmunna í færeyskri lögsögu.

„Sérfræðingar í ráðuneytinu meta það svo að út frá verðmætum veiðiheimildanna hafi frekar hallað á Íslendinga,“ segir Kristján Þór í umfjöllun um mál þetta í Morgunblaðinu í dag.