Hækka frítekjumark veiðigjalda

Meirihluti atvinnuveganefndar Alþingis leggur til að hækka frítekjumark til þess að koma til móts við smærri og meðalstórar útgerðir, einnig leggur meirihlutinn til að nytjastofnar sem mynda lítið aflaverðmæti verði undanþegnir veiðigjöldum. Þetta kemur fram í tilkynningu um breytingartillögur meirihluta nefndarinnar við frumvarp um veiðigjöld.

Lagt er til að „frítekjumark nemi 40% af fyrstu 6 milljónum króna álagningar hvers árs hjá hverjum gjaldskyldum aðila, en núverandi frítekjumark hefur verið 20% af fyrstu 4,5 milljónum króna.

„Með þessu leitast nefndin við að koma sérstaklega til móts við litlar og meðalstórar útgerðir vítt og breitt um landið,“ kemur fram í tilkynningunni. Þá segir að umrædd breyting sé í samræmi við stjórnarsáttmála ríkisstjórnarinnar um að efla „hinar dreifðu sjávarbyggðir“.

Nytjastofnar sem mynda aflaverðmæti sem er lægra en 100 milljónir króna á grundvelli meðaltals undangenginna þriggja ára munu ekki mynda stofn til veiðigjalds. Er breytingin rökstudd með því að vísa til að þessir tilteknu stofnar eru veiddir í litlum mæli og eru oftast meðafli.

„Af þeim sökum er erfitt að meta sérstaklega raunverulega afkomu af veiðum þeirra. Jafnframt vísar nefndin til þess að gjaldtaka á þessar tegundir getur dregið að nauðsynjalausu úr sókn í þær og aukið hættu á brottkasti.“

Meirihluti atvinnuveganefndar staðhæfir að frumvarpið mun tryggja að álagning veiðigjalda verði meira í takt við afkomu greinarinnar og verði innbyggður hvati til endurnýjunar fiskiskipa og búnaðar, sem um sinn mun stuðla að minnkun umhverfisspors við nýtingu sjávarauðlindarinnar.

• Blogga um frétt