Norðsnjáldra rak á land í Klaufinni í Vestmannaeyjum fyrir nokkrum dögum, trúlega á sunnudag. Snjáldrinn er af tegund svínhvela og heldur sig yfirleitt á djúpsævi langt frá landi. Sjaldgæft er að dýr af þessari tegund reki hér á land. Annar slíkur fannst þó á Snæfellsnesi síðasta vetur, en sá fyrsti við Breiðdalsvík 1992.

Í Eyjum var um karldýr að ræða sem var tæplega fimm metrar að lengd, en norðsnjáldrar geta orðið um 1,5 tonn á þyngd. Sýni hafa verið tekin úr dýrinu, sem verða rannsökuð á vegum Hafrannsóknastofnunar. Hausinn hefur verið fjarlægður af dýrinu og verður sníkjudýr sem fannst í höfði þess rannsakað sérstaklega. Hausinn er fremur lítill og frammjór eins og sjá má af myndinni. Karldýr svínhvela eru með tvær tennur, en kýrnar eru tannlausar.

Talið er að fimm tegundir svínhvela sé að finna í N-Atlantshafi og er norðsnjáldri sá eini sem hefur fundist við Ísland. Lítið er vitað um útbreiðslu og fjölda norðsnjáldra.

Tengdar fréttir

Íslenska dýraríkið

Búast við 10 þúsund pysjum í ár

• Gæsahópur stöðvaði umferð um fjölfarin gatnamót
• Velja íslenskt hafsvæði í stað þess karabíska
• „Verulega óvenjulegt og ótrúlega merkilegt“
• „Fer að verða eins og heimilisköttur“

» Fleiri tengdar fréttir