Tuttugu sagt upp hjá Nesfiski

Stjórn Nesfisks ehf. tók ákvörðun á mánudaginn um að grípa til hópuppsagnar starfsmanna sem starfa við heitloftsþurrkun Nesfisks í Iðngörðum í Garði. Þetta kemur fram í fréttatilkynningu frá stjórn félagsins.

„Ákvörðunin er tekin af þeirri ástæðu að Heilbrigðiseftirlit Suðurnesja hefur ekki enn afgreitt og gefið út starfsleyfi fyrir heitloftsþurrkun Nesfisks þrátt fyrir að heilbrigðisnefnd svæðisins hafi á fundi sínum 1. nóvember sl. tekið þá ákvörðun að veita skyldi tímabundið starfsleyfi til 31. maí 2019,“ segir í fréttatilkynningu frá Nesfiski þar sem er jafnframt tekið fram að um erfiða ákvörðun hafi verið að ræða.

Þær uppsagnir sem nú koma til framkvæmda ná til 20 starfsmanna. Nesfiskur hefur haldið öllum starfsmönnum á launaskrá fram til þessa þrátt fyrir óvissu um starfsleyfið.