Nýi vitinn framúr áætlun

Upplýst var á fundi borgarráðs í fyrradag að kostnaður af framkvæmdum við nýja innsiglingarvitann við Sæbraut myndi fara mikið fram úr fram úr áætlun. Jafnframt kom fram að verkið hefði tafist umtalsvert. Nýi vitinn kemur í stað vita í turni Sjómannaskólans.

Vigdís Hauksdóttir, áheyrnarfulltrúi Miðflokksins í borgarráði, lagði fram átta spurningar varðandi siglingavitann á fundi 4. október sl. og svörin voru birt í fyrradag.

Í svari umhverfis- og skipulagssviðs borgarinnar kemur fram að nú sé áætlað að kostnaður Reykjavíkurborgar vegna vitans verði 150 milljónir króna en áður hafi verið kynnt í borgarráði (25.1. 2018) að kostnaður borgarinnar yrði 100 milljónir króna. Faxaflóahafnir sf. greiða svo 25 milljónir vegna landfyllingar og grjótvarna auk þess að greiða fyrir smíði vitahúss, ljósbúnað o.fl. Heildarkostnaður við verkið stefnir því í að verða 175 milljónir króna.

Hækkunin er tilkomin vegna hærra tilboðs en áætlanir gerðu ráð fyrir auk þess sem umfang við landfyllingu, grjótvarnir og gerð hjáleiða var meira en áætlað var, að því er fram kemur í umfjöllun um framkvæmd þessa í Morgunbæaðinu í dag.