Fullkomin nótaþvottastöð á Eskifirði

Egersund Ísland á Eskifirði vinnur nú að uppbyggingu nýrrar þvottastöðvar fyrir fiskeldisnætur. Ekki er langt þar til starfsemin hefst, þvottavélin er komin á staðinn en enn á eftir að koma upp miklu dælu- og hreinsikerfi.

Egersund Ísland er hluti af samstæðu Egersund hinnar norsku, sem rekur átta nótaþvottastöðvar í nágrenni við flest helstu fiskeldissvæði Noregs. Barði Westin, þjónustustjóri fiskeldis hjá fyrirtækinu, segir að mikil þörf sé á þessari þjónustu hér á landi, en hann vonast til að geta þjónað flestum fiskeldisstöðvum landsins.

Jafnframt vonast hann til að hægt verði að gangsetja nýju þvottastöðina í byrjun nýs árs. Stefán Ingvarsson, framkvæmdastjóri fyrirtækisins, segir að ótrúlega margir starfi þegar við fiskeldi á Eskifirði og fyrirtækið kaupi auk þess margvíslega þjónustu á staðnum. „Þetta á bara eftir að stækka,“ segir hann í umfjöllun um þvottastöðina i Morgunblaðinu í dag.