Meðalaldur fiskiskipaflotans hefur hækkað umtalsvert og er nú hár í sögulegu samhengi. Sum skipanna eru komin á sextugsaldur og hluti flotans því orðinn nokkuð gamall. Þetta er meðal þess sem fram kemur í nýrri skýrslu Íslandsbanka um stöðu íslensks sjávarútvegs.

Bent er á að fiskiskipafloti landsins samanstandi af 1.621 skipi og bát, og þar af séu 842 opnir fiskibátar eða um 52% flotans. Um 747 vélskip séu í flotanum og 43 togarar.

„Frá aldamótum náði fjöldi skipa hámarki á árinu 2001 þegar þau voru 2.012 talsins og hefur þeim fækkað um 391 síðan þá eða um rúm 19%. Hefur togurum fækkað um 36 og hefur þeim fækkað hlutfallslegamest yfirtímabilið eða um 45%,“ segir í skýrslunni.

Á árunum 1999-2017 hafi meðalaldurinn hækkað um rúm tíu ár. Hann hafi á árinu 2016 verið um 30 ár. Íslenski fiskiskipaflotinn sé kominn til ára sinna.

Áætluð fjárfesting í íslenska fiskiskipaflotanum nemur um 30 milljörðum króna. Ljósmynd/Þröstur Njálsson

Samið um smíði á átta togurum

„Meðalaldur togara lækkaði þó um 5 ár á árinu 2017 og er það til marks um nýja togara sem teknir voru í notkun á árinu. Er það í fyrsta skipti síðan á árinu 2007 sem meðalaldur togara lækkar á milli ára.“

Bent er á að um þessar mundir séu talsverðar fjárfestingar í skipum í farvatninu. Fjárfesting í greininni hafi verið yfir sögulegu meðaltali undanfarin ár.

„Samið hefur verið um smíði á átta togurum og ættu flestir að verða afhentir á árinu 2019. Þá eru einnig væntanleg tvö uppsjávarskip sem áætlað er að verði afhent árið 2020. Á þessu ári hafa þegar verið afhentir tveir togarar.“

Áætluð fjárfesting í íslenska fiskiskipaflotanum nemur um 30 milljörðum króna samkvæmt spá bankans, sem miðuð er við áætlanir á næstu þremur árum eins og sakir standa.

Tengdar fréttir

Endurnýjun skipaflotans

Gáttaðir á því hvað Hulda er gott sjóskip

• Nýr Hákon stórglæsilegur
• Hulda Björnsdóttir GK-11 á heimleið
• Sigurbjörg nýtur sólarinnar á Jónahafi
• Unnið hörðum höndum í nýjum Hákoni

» Fleiri tengdar fréttir

• Blogga um frétt