Grænt ljós á tillögu um strandeldi

Skipulagsstofnun hefur fallist á tillögu Landeldis ehf. að matsáætlun vegna fyrirhugaðrar strandeldisstöðvar fyrirtækisins á Laxabraut 1 við Þorlákshöfn, sem verður með allt að 5.000 tonna ársframleiðslu á laxfisksafurðum.

Stofnunin birtir ákvörðun sína með athugasemdum en framkvæmdin er háð mati á umhverfisáhrifum. Landeldi hyggst reisa fiskeldisstöð til þauleldis laxfiska, lax, bleikju og urriða/sjóbirtings upp í sláturstærð á sjávarlóð við Laxabraut.

Ala á fiskinn upp í landkerjum og kemur fram í tillögunni að matsáætlun vegna verkefnisins að heildarframleiðslugeta stöðvarinnar verði þegar fullum afköstum er náð 5.000 tonn af slægðum afurðum árlega eins og fyrr segir og þá muni svonefndur hámarkslífmassi stöðvarinnar nema um 2.500 tonnum, að því er fram kemur í umfjöllun um fiskeldisáform þessi í Morgunblaðinu í dag.