Þorskurinn fullur af loðnu

Þorskur sem Akurey AK, togari HB Granda, veiddi í Víkurálnum var stór og góður og fullur af loðnu, að sögn Eiríks Jónssonar skipstjóra. Það þótti honum vita á gott, að því er fram kom í frétt útgerðarinnar.

Allir ísfisktogarar HB Granda eru komnir í land vegna hlés sem verður á veiðum og vinnslu yfir jólahátíðina. Akurey AK kom síðust til hafnar í Reykjavík í gærmorgun með rúmlega 130 tonna afla. Bræla var á miðunum þegar togarinn fór út en svo fengu þeir ágætis veður í nokkurn tíma.

Ágætis þorskveiði var í Víkurálnum en þegar hún minnkaði fóru þeir norður eftir Vestfjarðamiðum þar sem fékkst ufsi og karfi. Þriðjudagurinn féll út vegna haugabrælu en svo fengu þeir ágætis þorskveiði út af Þverálshorni áður en haldið var heim.