N1 skiptir út olíu fyrir skipaflotann

N1 mun frá og með næstu áramótum hætta sölu á svokallaðri Marine Diesel Oil (MDO) til íslenska skipaflotans. Umrædd olíutegund hefur verið notuð á stærri skip sem kjósa að nota ekki svartolíu, en hún hefur þó 0,25% brennisteinsinnihald.

Þetta kemur fram í tilkynningu frá olíufélaginu. Segir þar að í stað áðurnefndrar olíu muni N1 flytja inn og selja á skipaflotann olíu sem inniheldur aldrei meira en 0,1% brennistein.

Kolefnisjafna flug og notkun bíla

„N1 hefur undanfarin ár einbeitt sér af síauknum krafti að umhverfismálum og sem hluta af samfélagsábyrgð fyrirtækisins leitum við allra leiða til að verða grænni og betri fyrir umhverfið. Þannig kolefnisjöfnum við allt flug og notkun bíla N1 með samningi við Kolvið. Við settum okkur skýr markmið varðandi losun gróðurhúsalofttegunda, erum sífellt að minnka úrgang og við drögum verulega úr óflokkuðum úrgangi, svo dæmi séu tekin,“ er haft eftir Hinriki Erni Bjarnasyni, framkvæmdastjóra N1.

„Þetta er hins vegar verkefni sem lýkur aldrei en við leggjum okkar lóð á vogarskálarnar með því að reyna að minnka fótspor á þeim vörum sem við seljum. Breytingin á olíunni er dæmi um slíkt,“ segir Hinrik Örn.

Bent er á að fram undan séu frekari breytingar. Í ársbyrjun 2020 taki gildi ný reglugerð, IMO 2020, en í henni felist að verulega verði dregið úr brennisteinsinnihaldi á svartolíu.  Nú megi hún mest vera 3,5% en frá og með 1. janúar 2020 megi hún innihalda að hámarki 0,5% brennistein.

• 1 blogg um fréttina

Bloggað um fréttina

• Vilhjálmur Baldursson: Ekki alveg rétt