Nýtt skip Eimskips tilbúið næsta sumar

Fyrra skipið af tveimur, sem eru í smíðum fyrir Eimskipafélagið í Kína, var sjósett föstudaginn 14. desember síðastliðinn. Vinna við skipið heldur áfram og má búast við því að það komi til Íslands eftir mitt ár 2019, samkvæmt upplýsingum Ólafs William Hand, upplýsingafulltrúa Eimskips.

Skipin tvö eru stærstu vöruflutningaskip sem smíðuð hafa verið fyrir Íslendinga. Nýju skipin verða 26.500 brúttótonn. Til samanburðar eru stærstu skip Eimskips nú, Dettifoss og Goðafoss, 14.664 brúttótonn. Þau skip voru smíðuð árin 1995 og 1996.

Hvort um sig verða nýju skipin 2.150 gámaeiningar, 180 metrar á lengd og 31 metri á breidd. Ganghraði verður 20,5 sjómílur á klukkustund.

Skipin verða búin aðalvélum frá MAN. Þau verða með (TIER III) vél sem er sérstaklega útbúin til að draga úr útblæstri köfnunarefnis (NOx) út í andrúmsloftið, að því er fram kemur í Morgunblaðinu í dag.