Biðin lengist eftir stórum árgangi þorsks

„Þetta er fyrsta vísbendingin sem við fáum um klakið sem var í vor. Við höfum beðið eftir því undanfarin ár að fá stóran og góðan árgang í þorski. Biðin verður líklega eitthvað lengri, miðað við það sem við höfum séð af þessum árgangi,“ segir Guðmundur Þórðarson, sviðsstjóri botnsjávarlífríkis hjá Hafrannsóknastofnun.

Niðurstöður árlegs haustleiðangurs stofnunarinnar, sem gerður var frá 1. október til 12. nóvember, voru birtar í gær.

„Stofnvísitalan er að lækka talsvert mikið frá síðasta ári, en hún rauk líka mikið upp á síðasta ári og núna er hún komin á svipaðan stað og hún var áður, miðað við tímabilið frá árinu 2013,“ segir Guðmundur í samtali við 200 mílur.

Sterkari grundvöllur skilaboða

Inn í vísitöluna kemur nú árgangurinn frá árinu 2013, sem er lélegur að sögn Guðmundar og veldur tilkoma hans meðal annars þessari lækkun stofnvísitölunnar.

Hann segir þessar niðurstöður mynda sterkari grundvöll undir þau skilaboð sem stofnunin hafi sent frá sér undanfarin misseri:

„Ef ekki kemur meiri nýliðun en raun ber vitni, þá er þess ekki að vænta að ráðlagður afli aukist neitt að ráði. Við erum eiginlega komin í ákveðið jafnvægi, þar sem aukning undanfarinna ára hefur verið vegna þess að fiskurinn hefur náð að stækka og lifa lengur.“

Að sama skapi megi ekki endilega búast við að aflaráðgjöf minnki. „Við vonum að svo verði ekki. Við erum samt að sjá minnkun bæði í haust- og vorralli á þessu ári. Rétt er þó að halda því til haga að árið 2017 var ansi óvenjulegt ár hvað þetta varðar, þar sem háar vísitölur fengust þá. Stofnmatið byggist svo á þessum tveimur mælingum auk gagna frá veiðunum.“

Ítarlegra viðtal við Guðmund má lesa í ViðskiptaMogganum sem fylgdi Morgunblaðinu í dag.